Seanca e Komisionit Parlamentar për Politikë Sociale sërish është ndërprerë

Komisioni Parlamentar për Politikë Sociale, Demografi dhe Rini edhe më tej mbetet i bllokuar. Seanca e sotme u ndërpre sërish pasi deputetët e LSDM-së kërkuan plotësimin e rendit të ditës me Propozim-ligjin për mbrojtësit, ndërsa kryesuesja e Komisionit Imërlije Saliu Fetai nuk u pajtua me këtë, duke treguar se është caktuar nga kryetari i Kuvendit për ta udhëhequr seancën vetëm për Propozim-ligjin për mbrojtjen e fëmijëve.

Seanca u ndërprerë me kërkesë të deputetëve të koalicionit “Vlen”, ndërsa siç theksoi Saliu-Fetai ndërpritet për një kohë të pacaktuar. Sipas Saliu-Fetait, për Propozim-ligjin për mbrojtësit kanë kaluar të gjitha afatet.

Deputetja e LSDM-së, Jovanka Trençevska, tha se ka të drejtë procedurale të propozojë plotësim të rendit të ditës dhe se kryesuesi i Komisionit duhet ta vë në votim një propozim të tillë sepse Propozim-ligji për mbrojtësit është ende në sistem.

“Pa dallim nëse ligji ju pëlqen apo jo, nuk keni të drejtë të ma mohoni të drejtën procedurale për të propozuar plotësim të rendit të ditës”, tha Trençevska.

Deputetët e VMRO-DPMNE-së kanë reaguar duke theksuar se kjo lëvizje e opozitës është hipokrite sepse deputetët e LSDM-së nuk kanë qenë të pranishëm në seancën e 12 shtatorit të vitit të kaluar kur kjo pikë ka qenë në rend dite.