Blerim Sejdiu del kundër Arben Taravarit!

Kryetari i Komunës së Zhelinës, Blerim Sejdiu nga Lëvizja Besa ka komentuar qasjen kritikuese që Arben Taravari ka deklaruar ndaj koalicionit VLEN.
Sipas tij VLEN janë faktor kyç në qeveri dhe se problemet e mundshme brenda koalicionit duhet të diskutohen brenda VLEN-it dhe jo me deklarata publike.
Reagimi i plotë:
Përsëri tentohet të hidhet pluhur syve!
Të qëndrojmë tek e vërteta.
E para, VLEN është faktor kyç në Qeveri – VLEN është pjesë thelbësore e Qeverisë dhe përfaqësuesit tanë kanë ndikim të drejtpërdrejtë në vendimmarrje. Nuk ka vend për narrativa që përpiqen të zvogëlojnë rolin e VLEN-it. Këto përpjekje do i bëjmë të dështojnë!
E dyta, sa i përket “koordinimit” mes VLEN, nëse ka çështje që kërkojnë përmirësim në koordinim, ato duhet të trajtohen brenda VLEN-it, dhe jo nëpërmjet deklaratave publike që dëmtojnë pozitën e përbashkët. Nuk është momenti për të bërë lojëra politike individuale.
E treta, funksionarët që japin dorëheqje ose bëjnë deklarata të tilla si “e provuam por nuk ia dolëm”, atëherë është çështje e paaftësisë së tyre personale dhe jo e VLEN-it. VLEN nuk mund të mbajë përgjegjësi për dështimet e individëve.
E katërta, fundja roli i Taravarit është përgjegjësi e tij – nëse Taravari pretendon se VLEN nuk ka fuqi, atëherë pse funksionarët e tij pranuan poste? Kjo tregon një qëndrim kontradiktor që duhet të sqarohet nga ai dhe nga njerëzit e tij, jo nga VLEN.
E pesta, duhet mbajtur përgjegjësi politike –pra, funksionarët duhet të sillen me përgjegjësi dhe lojalitet ndaj misionit të VLEN-it. Nëse nuk janë të kënaqur, kanë të drejtën të largohen, por nuk kanë të drejtë të dëmtojnë strukturën që u dha mundësinë të kontribuojnë.
VLEN është forcë e organizuar dhe efektive, dhe nuk do të lejojë që individë të pakënaqur të dëmtojnë imazhin e saj për interesa personale.