Suedia paralajmëron se Rusia mund të pushtojë një ishull në çdo moment për të ‘testuar’ NATO-n

Suedia po rrit vigjilencën për një skenar të mundshëm tensioni në Detin Baltik, ku Rusia mund të ndërmarrë një operacion të kufizuar ushtarak për të testuar reagimin e NATO-s.

Paralajmërimi vjen nga shefi i mbrojtjes suedeze, Michael Claesson, i cili ka folur për mundësinë e një ndërhyrjeje të shpejtë dhe të kufizuar, jo domosdoshmërisht në shkallë të gjerë, por të mjaftueshme për të parë reagimin politik dhe ushtarak të aleancës.

Sipas analizave të sigurisë, rreziku nuk lidhet vetëm me ishujt më të njohur strategjikë, por edhe me zona më të vogla në Detin Baltik, ku një lëvizje e tillë mund të kalojë fillimisht pa u vënë shumë në dukje.

Në vitet e fundit, aktiviteti ushtarak rus në këtë rajon është shtuar, duke përfshirë lëvizje detare dhe ndërveprime me forcat e NATO-s. Kjo ka bërë që vendet e rajonit dhe aleanca të rishikojnë skenarët e mbrojtjes, duke kaluar nga fokusi tokësor në atë detar.

Shqetësimet lidhen edhe me mundësinë që, pas përfundimit të luftës në Ukrainë, Rusia të riorganizojë forcat dhe t’i zhvendosë më afër kufijve të NATO-s.

Ndërkohë, në rajon janë shënuar disa incidente, përfshirë shkelje të hapësirës ajrore dhe tensione me dronë, çka ka shtuar ndjeshmërinë e situatës. Vendet baltike kanë forcuar masat mbrojtëse dhe kanë rritur gatishmërinë për çdo zhvillim të papritur.