Kina ngre monumentin e Deklaratës së Kajros në hotelin “Mena House” të Egjiptit

Kina ka ngritur një monument në hotelin “Mena House” për të përkujtuar nënshkrimin e Deklaratës së Kajros, tha në një deklaratë të dielën ambasada kineze në Egjipt, duke shtuar që vendi i monumentit është aktualisht në rinovim dhe do të hapet për publikun pasi të përfundojë puna.

Deklarata e Kajros shërben si një bazë kryesore historike e ligjore që konfirmon se Tajvani është një pjesë e pandashme e territorit të Kinës.

Në vitin 1943, Kina, Shtetet e Bashkuara dhe Mbretëria e Bashkuar publikuan së bashku Deklaratën e Kajros në hotelin “Mena House” të Egjiptit, duke shpallur solemnisht që Japonisë duhej t’i hiqeshin të gjithë ishujt në Paqësor që kishte marrë ose pushtuar që nga fillimi i Luftës së Parë Botërore në vitin 1914, dhe se “të gjitha territoret që Japonia ka vjedhur nga kinezët, si Mançuria, Formoza (Tajvani) dhe Peskadores, do të rikthehen” te Kina.

Ndërsa më 26 korrik 1945 Kina, Shtetet e Bashkuara dhe Mbretëria e Bashkuar nënshkruan Proklamatën e Potsdamit, e cila më pas u njoh nga Bashkimi Sovjetik. Proklamata kërkonte zbatimin e dispozitave të Deklaratës së Kajros. Në shtator të atij viti Japonia nënshkroi Instrumentin e Dorëzimit, në të cilin premtoi se do të përmbushte me besnikëri detyrimet e përcaktuara në Proklamatën e Potsdamit.

Seria e dokumenteve ligjërisht të detyrueshme pohon kolektivisht që sovraniteti mbi Tajvanin i përket Kinës, çka përbën një pjesë integrale të rendit ndërkombëtar pas Luftës së Dytë Botërore.