Irani sulmon tankerat: Kaos në tregun e naftës dhe përshkallëzim i luftës

Irani ka goditur dhe djegur dy tankera në ujërat irakiane pasi intensifikoi sulmet e tij ndaj objekteve të naftës dhe transportit në të gjithë Lindjen e Mesme, duke paralajmëruar se çmimi i naftës mund të rritet deri në 200 dollarë për fuçi, gjë që bie ndesh me pohimin e Donald Trump se SHBA-ja tashmë e ka fituar luftën.

​Nga sulmet amerikano-izraelite ndaj Iranit deri më tani kanë mbetur të vrarë pothuajse 2,000 civilë, ndërsa tregjet globale të energjisë dhe transporti janë hedhur në kaos.

​Në një tubim në Kentucky, Trump tha se SHBA-ja e ka fituar luftën, por nuk dëshiron të kthehet çdo dy vjet.
​”Ne nuk duam të largohemi para kohe. Duhet ta përfundojmë punën,” tha Trump.
​Çmimet globale të naftës arritën sërish në 100 dollarë për fuçi këtë mëngjes, duke u rritur me pothuajse 10% krahasuar me dje, për shkak të frikës së përtërirë për ndërprerje të furnizimit.

​Anijet iraniane të mbushura me eksploziv sulmuan dy tankera në ujërat irakiane, me ç’rast ata u përfshinë nga flakët dhe një person humbi jetën. Kjo pason sulmin e djeshëm ndaj tre anijeve cargo në ujërat e Gjirit. Irani gjithashtu sulmoi tankera në Bahrein dhe një depo nafte në Oman.

​Autoritetet iraniane e kanë bërë të qartë se synojnë të imponojnë një goditje të zgjatur ekonomike ndërsa lufta vazhdon, ndërsa Agjencia Ndërkombëtare e Energjisë njoftoi se 32 vende kanë rënë dakord të çlirojnë 400 milionë fuçi naftë nga rezervat strategjike globale për të stabilizuar çmimet, që është ndërhyrja më e madhe e tillë në histori.

​”Ky vendim do të ulë ndjeshëm çmimet e naftës ndërsa ne i japim fund këtij kërcënimi për Amerikën dhe botën,” tha Trump.

​Deri më tani nuk ka shenja se anijet mund të lundrojnë të sigurta përmes Ngushticës së Hormuzit, përmes së cilës zakonisht kalon një e pesta e naftës botërore. Një zëdhënës i ushtrisë iraniane deklaroi dje se kalimi është “padyshim nën kontrollin e Iranit”, ndërsa grupi G7, i cili përfshin SHBA-në, Kanadanë, Japoninë, Italinë, Britaninë e Madhe, Gjermaninë dhe Francën, ra dakord të shqyrtojë opsionet për sigurimin e anijeve në mënyrë që ato të lëvizin lirshëm në Gji.

​”Ngushtica është në gjendje të shkëlqyer. Ne i shkatërruam të gjitha anijet iraniane. Ata kanë ende disa raketa, por jo shumë,” tha Trump.