Kina paralajmëron SHBA-në dhe Izraelin: „Mos e prekni liderin e ri të Iranit“
Pekini ka shprehur kundërshtimin e tij ndaj çfarëdo lloj aksioni të huaj kundër liderit të ri suprem të Iranit, Mojtaba Khamenei.
”Kina kundërshton ndërhyrjen në punët e brendshme të vendeve të tjera nën çfarëdo preteksti, ndërsa sovraniteti, siguria dhe integriteti territorial i Iranit duhet të respektohen,” deklaroi zëdhënësi i Ministrisë së Punëve të Jashtme të Kinës, Guo Jiakun, në një konferencë të rregullt për shtyp, duke iu përgjigjur pyetjeve rreth kërcënimeve nga SHBA-ja dhe Izraeli.
Izraeli paralajmëroi javën e kaluar se lideri i ri suprem i Iranit do të jetë “shënjestër”, madje edhe para se djali i Khameneit të zgjidhej për të marrë detyrën. Presidenti amerikan, Donald Trump, tha se lideri i ri “nuk do të zgjasë shumë” pa miratimin e tij.
Zëdhënësi kinez e përshkroi emërimin e Khameneit si një çështje të brendshme iraniane. “I kemi marrë parasysh raportet për këtë çështje. Ky është një vendim i marrë nga pala iraniane në përputhje me kushtetutën e saj,” tha ai.
Pekini shprehu zemërimin e tij për operacionet ushtarake të SHBA-së dhe Izraelit në atë vend dhe ekzekutimin e ish-liderit suprem, Ayatollah Ali Khamenei, i cili u vra në ditën e parë të luftës dhe u pasua nga Mojtaba Khamenei.
”Kina u bën thirrje palëve që të ndërpresin menjëherë operacionet ushtarake, të vazhdojnë dialogun dhe negociatat sa më shpejt të jetë e mundur dhe të shmangin çdo përshkallëzim të mëtejshëm të tensioneve,” përsëriti zëdhënësi.
Ekspertët thonë se është e pakët mundësia që, përkundër ndikimit të konfliktit në importin e naftës, Kina të sakrifikojë interesat e saj dhe t’u kundërvihet Shteteve të Bashkuara për të ndihmuar partnerin e saj iranian.
