Gjermania: Kemi gjetur investitorët, 25 miliardë euro për blerjen e Tik-Tok Europe

Qeveria gjermane ka gjetur investitorë të interesuar për të investuar deri në 25 miliardë euro për të blerë shumicën e operacioneve të TikTok-ut në BE, tha të premten për gazetarët ministri i Kulturës i Berlinit, Wolfram Weimer.

“Ne kemi folur tashmë me shumë investitorë”, tha ai. “Është një iniciativë pan-europiane dhe ne mendojmë se ata janë në gjendje të investojnë rreth 25 miliardë euro në këtë lloj biznesi. Dhe TikTok Europe duhet të jetë i hapur për të shitur 75% deri në 80% të aksioneve.”

Gjermania dhe Austria e propozuan iniciativën e stilit Trump më herët këtë javë, duke përmendur shqetësimet për ndikimin e TikTok-ut në demokracinë europiane.

Një zëdhënës i TikTok-ut e hodhi poshtë të premten nismën si “të pakuptimtë”, duke thënë se kompania “është tashmë subjekt i ligjit të plotë europian, përfshirë Aktin e Shërbimeve Dixhitale dhe GDPR-në, të cilat ofrojnë kuadro të qartë ligjorë për çdo kompani që investon dhe operon në Europë.”

Presidenti amerikan Donald Trump detyroi shitjen e degës amerikane të TikTok-ut te investitorët amerikanë më herët këtë vit, duke kërcënuar se do ta ndalojë aplikacionin në vend, duke përmendur shqetësime të sigurisë kombëtare. Lëvizja u kritikua si një mënyrë për të mbajtur një kontroll politik mbi vendin, si dhe fakti që investitorët ishin aleatë të afërt të Trump-it, si themeluesi i Oracle, Larry Ellison.

“Skema është e njëjtë me atë që amerikanët bënë nën udhëheqjen e Oracle”, tha Weimer, i cili shtoi se investitorë në pesë vende europiane ishin të interesuar, pa specifikuar se cilat ishin ato.

Ministri i Kulturës foli me gazetarët para një takimi me homologët e tij, ku do të përpiqej të siguronte më shumë mbështetje.

App Icon
TetovaSot App
Shkarkoje tani nga playstore!
Instalo