Janev në punëtori për krimin kompjuterik: I forcojmë kapacitetet policore për përballje me kërcënimet digjitale dhe hibride
Sot në Shkup, drejtori i Byrosë për Siguri Publike, Aleksandar Janev, u drejtua në punëtorinë me temë “Hetime për krimin kompjuterik”, e organizuar dhe realizuar me mbështetje të Ambasadës së Shteteve të Bashkuara të Amerikës në Shkup, ku marrin pjesë oficerë policorë nga shërbimet qendrore dhe rajonale në përbërje të Byrosë për Siguri Publike.
Në fjalimin e tij, drejtori Janev theksoi se në kushte kur hapësira digjitale bëhet fushë e sfidave të reja të sigurisë, ndërsa kërcënimet hibride dhe krimi kompjuterik kërkojnë qasje hetimore gjithnjë e më të sofistikuara, përmirësimi i vazhdueshëm i njohurive, shkëmbimi i përvojave dhe shkëmbimi i informacionit në kohë janë me rëndësi thelbësore për luftë efikase kundër krimit.
Ai nënvizoi se përmes bashkëpunimit me Byronë Federale të Hetimeve (FBI) përmirësohen kapacitetet profesionale të policisë maqedonase, shkëmbehen përvoja për metodat moderne hetimore dhe forcohen aftësitë për zbulimin dhe hetimin e krimit kompjuterik, si dhe për sigurimin e provave digjitale nga platformat online.
Drejtori Janev shprehu falënderim ndaj Ambasadës së SHBA në Shkup, Departamentit Amerikan të Drejtësisë (Department of Justice) dhe programit ICITAP për mbështetjen e vazhdueshme, dijen e ndarë dhe partneritetin, të cilat kontribuojnë për përmirësim konkret të kapaciteteve të policisë maqedonase.
„Qëllimi ynë është i qartë – mbështetjen nga partnerët ta shndërrojmë në dije të qëndrueshme, kapacitete vetjake dhe zgjidhje të qëndrueshme. Si Ministri, gjithnjë e më shumë do të investojmë me mjete buxhetore vetjake dhe me burimet tona njerëzore e profesionale në modernizimin dhe forcimin e kapaciteteve policore. Vetëm kështu mund të ndërtojmë sistem sigurie rezistent, efikas dhe të qëndrueshëm, të gatshëm të përgjigjet ndaj kërcënimeve të sotme dhe të ardhshme“, theksoi drejtori Janev.
Në fund të fjalimit, drejtori Janev potencoi se partneriteti ndërkombëtar, dijen e ndarë dhe ndërtimi i përbashkët i kapaciteteve janë bazë për forcimin e besimit të ndërsjellë, parandalim më të mirë, reagim në kohë dhe sigurimin e një sigurie më të madhe për qytetarët.
