Shasivari ultimatum LSDM-së: Tërhiqni 9 mijë amendamentet, kthehuni në dialog

Ministri i Drejtësisë, Jeton Shasivari, i bëri thirrje LSDM-së që të rikthehet në dialogun për reformën zgjedhore dhe të tërheqë rreth 9 mijë amendamentet e dorëzuara.

Në takimin konsultativ në Ministrinë e Drejtësisë morën pjesë përfaqësues të të gjitha partive parlamentare, me përjashtim të LSDM-së. Sipas Shasivarit, qëllimi është zhbllokimi i procesit dhe rikthimi i tij në kuadër të dialogut institucional.

Ai paralajmëroi se do të kërkojë takim me kryetarin e LSDM-së, Venko Filipçe, për t’i dhënë një mundësi të re procesit, i cili është pjesë e agjendës reformuese.

Shasivari theksoi se dallimet politike nuk duhet të pengojnë përmirësimin e sistemit zgjedhor dhe se ndryshimet duhet të harmonizohen me standardet evropiane dhe rekomandimet e OSBE/ODIHR-së.