Rutte për kërcënimet ruse në Kaliningrad: Nuk i marr seriozisht, Putini nuk mund ta mposhtë NATO-n

Sekretari i Përgjithshëm i NATO-s, Mark Rutte, tha se nuk ka kërcënim të menjëhershëm për Aleancën dhe se ai nuk i merr seriozisht paralajmërimet e Rusisë për Kaliningradin, duke besuar se Moska po përpiqet të shkëpusë vëmendjen nga vështirësitë me të cilat po përballet në Ukrainë.

Rutte theksoi se nuk ka kërcënim të menjëhershëm për territorin e Aleancës, duke shtuar se nuk i sheh kërcënimet bërthamore të Rusisë si serioze, pasi Moska nuk mund të triumfojë kurrë në një konfrontim me NATO-n.

“Ne jemi përgatitur për këtë, kemi hartuar plane për këtë dhe kjo vlen për të gjithë NATO-n”, tha Rutte të mërkurën, në Samitin e Mbrojtjes dhe Hapësirës në Bruksel.

“Ne do të mbrojmë çdo centimetër të territorit të NATO-s. Nuk ka një kërcënim të tillë për momentin dhe, nëse ndodh diçka, ne jemi të gatshëm ta përballojmë”, shtoi ai.

Komentet e tij vijnë pas raportimeve se Rusia i ka dërguar një letër NATO-s duke e paralajmëruar aleancën që të mos përpiqet ta shkëpusë enklavën ruse të Kaliningradit nga pjesa tjetër e Rusisë. Moska thuhet se paralajmëroi se është gati të përdorë të gjithë arsenalin e saj, përfshirë armët bërthamore.

“Ne jemi një aleancë mbrojtëse. Ndaloni kërcënimet bërthamore. Ato janë krejtësisht të pajustifikuara dhe nuk ndihmojnë asgjë. Dhe, mbi të gjitha, ndaloni luftën në Ukrainë, një luftë agresioni të paprovokuar kundër saj”, tha Rutte.

Sekretari i përgjithshëm i NATO-s nuk pranoi të konfirmonte përmbajtjen e letrës, duke thënë se i takon Rusisë ta bëjë publike. Megjithatë, ai përjashtoi mundësinë e një kërcënimi të menjëhershëm bërthamor ose përshkallëzimit kundër shteteve baltike.

“Të gjithë e dinë që Vladimir Putini nuk mund ta mposhtë kurrë NATO-n. Unë nuk e marr seriozisht. Por sigurisht, ne duhet të përgjigjemi dhe ta bëjmë të qartë se NATO është një aleancë mbrojtëse, siç thashë. Ndaloni luftën në Ukrainë dhe ndaloni kërcënimet bërthamore“, tha ai.

Sipas Sekretarit të Përgjithshëm të NATO-s, Aleanca duhet të ruajë qetësinë, të vazhdojë të mbështesë Ukrainën dhe të rrisë investimet e saj në mbrojtje.

“Nëse është e nevojshme, sigurisht që do të mbrohemi. Por gjëja më e rëndësishme është se e gjithë kjo po ndodh sepse lufta në Ukrainë nuk po shkon mirë për të. Ai dëshiron të na përçajë. Ai dëshiron të na shpërqendrojë nga Ukraina“, tha Rutte.