Shasivari: Një mundësi e dytë për Kodin Zgjedhor – pres që LSDM-ja t’i bashkohet takimit të ardhshëm të grupit të punës
Ministri i Drejtësisë, Jeton Shasivari, së bashku me anëtarët e Grupit të punës për reforma në legjislacionin zgjedhor, sot diskutoi për çështjet e hapura dhe për hapat e nevojshëm për zhbllokimin e procesit dhe rikthimin e tij në një dinamikë aktive institucionale.
Ministria e Drejtësisë, gjatë periudhës së kaluar, inicioi një dialog të hapur, serioz dhe konstruktiv me të gjithë aktorët përkatës politikë dhe institucionalë, me qëllim që përmes diskutimit të argumentuar dhe propozimeve konkrete të arrihet përparim në reformën e legjislacionit zgjedhor.
“Kodi Zgjedhor nuk është pronë e asnjë partie politike, as e pushtetit dhe as e opozitës. Ai është ligj që përcakton rregullat demokratike sipas të cilave qytetarët realizojnë vullnetin e tyre të shprehur lirisht. Prandaj, të gjithë aktorët politikë kanë detyrimin të bisedojnë. Mund të kemi qëndrime të ndryshme politike, por nuk guxojmë të lejojmë që dallimet të bëhen pengesë për përmirësimin e sistemit zgjedhor”, theksoi Ministri i Drejtësisë, Jeton Shasivari.
Ministri Shasivari njoftoi se në periudhën e ardhshme do të kërkojë takim me deputetin dhe kryetarin e LSDM-së, Venko Filipçe, në të cilin do të diskutojnë për mundësitë e zhbllokimit të procesit dhe të pjesëmarrjes së serishme aktive të LSDM-së në punën e grupit të punës.
“Konsideroj se procesi zgjedhor dhe reforma e legjislacionit zgjedhor janë çështje që kërkojnë konsensus të gjerë politik dhe institucional. Prandaj, në periudhën e ardhshme do të kërkoj takim me kryetarin e LSDM-së, Venko Filipçe, me qëllim që të diskutojmë drejtpërdrejt për çështjet e hapura dhe të gjejmë një mënyrë për vazhdimin e procesit. Pres që LSDM-ja t’i bashkohet takimit të ardhshëm të grupit të punës dhe të japë kontributin e saj në reformë”, deklaroi Shasivari.
Siç theksoi Ministri, qëllimi nuk është matja e forcave politike, por përgjegjësia institucionale dhe krijimi i një legjislacioni zgjedhor që do të jetë i qëndrueshëm, i parashikueshëm, transparent dhe në përputhje me standardet evropiane dhe rekomandimet përkatëse të OSBE/ODIHR-it.
“Nuk pres që të gjithë të pajtohemi për gjithçka. Por pres që të bisedojmë. Kjo reformë shkon përtej interesave të politikës së ditës dhe prek çdo qytetar, sepse rregullat zgjedhore lidhen drejtpërdrejt me besimin në procesin demokratik dhe në institucione”, theksoi Ministri.
Ministria e Drejtësisë do të vazhdojë të punojë me Kuvendin, partitë politike, ekspertët, organizatat qytetare dhe të gjitha institucionet përkatëse, me qëllim sigurimin e një procesi gjithëpërfshirës dhe të zgjidhjeve cilësore për përmirësimin e legjislacionit zgjedhor.
“Integrimi evropian nuk është vetëm një deklaratë politike. Ai nënkupton reforma, institucione të forta, sundim të ligjit dhe rregulla që vlejnë njësoj për të gjithë. Rregullat zgjedhore janë për qytetarët, standardet evropiane janë detyrimi ynë, ndërsa dialogu është përgjegjësia jonë institucionale”, theksoi Ministri i Drejtësisë, Jeton Shasivari.
