Del jashtë kontrollit zjarri në Toskanë, mbyllet aeroporti i Pizës; qindra banorë evakuohen!
Rreth 700 persona largohen nga banesat, autoritetet dyshojnë për zjarrvënie të qëllimshme
Zjarret e mëdha që kanë përfshirë zonat malore në rajonin e Toskanës, në Italinë Qendrore, kanë detyruar qindra banorë të largohen nga shtëpitë e tyre dhe kanë çuar në mbylljen e aeroportit të Pizës.
Sipas autoriteteve lokale, rreth 700 persona janë evakuuar nga qytetet Calci dhe Vicopisano si masë parandaluese, ndërsa të gjitha shkollat në zonë janë mbyllur për arsye sigurie. Flakët, që nisën të hënën në zonën e Monte Mario, midis Pizës dhe Luccas, janë përhapur me shpejtësi për shkak të kushteve të favorshme atmosferike.
Zyrtarët dyshojnë se zjarret mund të jenë të qëllimshme, ndërsa hetimet për shkaqet e tyre janë në vijim.
Deri më tani nuk raportohen persona të lënduar apo dëme materiale, ndërsa autoritetet vijojnë përpjekjet për të vënë nën kontroll situatën dhe për të garantuar sigurinë e banorëve.
