Spanja miraton plan 7 miliardë euro për krizën e strehimit

Qeveria e Spanja ka miratuar një plan gjithëpërfshirës për të adresuar krizën e strehimit, një nga sfidat kryesore politike përpara zgjedhjeve të ardhshme për kryeministrin Pedro Sánchez.

Rritja e çmimeve të qirasë dhe banesave po i përjashton shumë qytetarë nga tregu, pavarësisht rritjes ekonomike të fundit. Analistët theksojnë se të ardhurat nuk kanë ndjekur të njëjtin ritëm, ndërsa turizmi dhe rritja e popullsisë urbane, e nxitur nga emigracioni, kanë shtuar presionin mbi ofertën.

Plani i ri, me vlerë 7 miliardë euro, parashikon trefishimin e investimeve në strehimin publik gjatë katër viteve të ardhshme dhe garanton që banesat e subvencionuara të mos riklasifikohen pas një periudhe të caktuar. Ai përfshin gjithashtu mbështetje për qiramarrësit e rinj dhe blerësit e shtëpive.

Sipas Raluca Budian nga shkolla e biznesit Esade, ky është një hap i rëndësishëm që shënon një angazhim serioz buxhetor pas dekadash.

Rreth 40% e fondeve do të përdoren për rritjen e stokut të banesave publike, ndërsa 30% do të dedikohen për rinovimin e pronave, përfshirë përmirësimin e efikasitetit energjetik dhe zhvillimin në zonat e shpopulluara. Pjesa tjetër do të ndahet për subvencione, me fokus tek të rinjtë.

Ministrja e Strehimit Isabel Rodríguez deklaroi se publiku kërkon zgjidhje konkrete për këtë problem madhor, i cili renditet vazhdimisht ndër shqetësimet kryesore të qytetarëve sipas CIS.

Sipas të dhënave të Eurostat, kostot e strehimit në Spanjë u rritën me afro 13% në fund të vitit 2025 krahasuar me një vit më parë.