Rutte viziton Ankaranë, vlerëson “revolucionin mbrojtës” të Turqisë

Sekretari i përgjithshëm i NATO-s, Mark Rutte vizitoi sot Ankaranë dhe kompaninë kryesore të industrisë së mbrojtjes ASELSAN, duke vlerësuar zhvillimin e shpejtë të sektorit ushtarak të Turqisë, sipas “Daily Sabah”.

Rutte u takua me zyrtarë të lartë turq, përfshirë ministrin e Mbrojtjes, ministrin e Jashtëm dhe presidentin Recep Tayyip Erdogan.

Ai vlerësoi revolucionin e industrisë së mbrojtjes në Turqi dhe tha se vendet e NATO-s mund të mësojnë nga përparimi i saj në fusha si dronët, sistemet ajrore dhe teknologjitë e radarëve.

Shefi i NATO-s theksoi se rritja e prodhimit ushtarak është po aq e rëndësishme sa shpenzimet për mbrojtje.

NATO, sipas tij, po përballet me kërcënime nga Rusia, Kina dhe Irani, dhe ka nevojë për kapacitete më të forta industriale dhe teknologjike.

Rutte tha se aleanca ka interceptuar disa raketa balistike të drejtuara drejt Turqisë nga Irani së fundmi.

Vizita tij u fokusua edhe në bashkëpunimin rajonal, përfshirë sigurinë në Ngushticën e Hormuzit dhe çështje të tjera mes Turqisë dhe Greqisë.

Gjithashtu, u diskutua pjesëmarrja e vendeve të Gjirit në samitin e ardhshëm të NATO-s dhe çështja e avionëve F-35.

Rutte vlerësoi zgjerimin ndërkombëtar të kompanive turke të mbrojtjes, përfshirë shitjet në Poloni dhe operacionet në Shqipëri dhe Rumani.

“Mbrojtja e 1 miliard njerëzve në të gjithë Evropën dhe Amerikën e Veriut nuk mund të arrihet vetëm nga ushtritë. Ajo gjithashtu kërkon kapacitet të fortë industrial. Turqia ka rritur bashkëpunimin në mbrojtje në të gjithë aleancën, dhe kompanitë turke po zgjerojnë ndikimin e tyre jashtë vendit, duke përfshirë eksportet dhe operacionet në disa vende evropiane. Ju bëj thirrje për bashkëpunim të vazhdueshëm nga Alaska në Ankara”, the Rutte.

“Kohët e fundit, ASELSAN i shiti Polonisë sisteme të përparuara të luftës elektronike. Ju keni filluar operacionet në Shqipëri dhe Rumani dhe keni pajisur një anije për Marinën Kroate”, shtoi ai.