Një këndvështrim nga Beogradi, gazetari Misha Iliq: Ohri ka një energji të mirë, besoj se mund të normalizohen marrëdhëniet Beograd- Prishtinë

“Franca dhe Gjermania kanë humbur kredibilitetin ndërkombëtar në ndërmjetësim për shkak të mashtrimeve diplomatike në zbatimin e marrëveshjeve Minsk 1 dhe Minsk 2. Unë besoj në marrëveshjen për normalizimin e marrëdhënieve ndërmjet Beogradit dhe Prishtinës vetëm për shkak të pranisë së Shteteve të Bashkuara të Amerikës. Ato patën sukses në Ballkan me Marrëveshjen e Paqes të Dejtonit, ia dolën edhe me Marrëveshjen e Ohrit”, thotë në një prononcim për portalin Politiko.mk, gazetari dhe analisti i pavarur serb, Milutin Misha Iliq.

“Ohri si vend si duket ka energji të mirë për bisedimet e ardhshme dhe për shkak të zgjidhjes së mirë nga viti 2001. Nuk pres asgjë spektakolare në datën 18, por pres përparim të rëndësishëm dhe një marrëveshje për dinamikën. Për mendimin tim, zoti Kurti është një politikan jashtëzakonisht radikal, por e respektoj si të zgjedhur nga shqiptarët e Kosovës. Megjithatë, ai është një marksist-leninist i fshehtë me vokacion, dhe për të demokracia është vetëm një e keqe e domosdoshme. Nuk besoj se do të jetë në gjendje të përshtatet në planet amerikane për ta bërë Ballkanin një zonë të qëndrueshme në Evropë, veçanërisht për shkak të konfliktit në Ukrainë”, deklaroi Misha Iliq.

Sipas tij, Vuçiq gjithnjë e më shumë po përpiqet të vendosë në plan të parë interesat shtetërore, duke i çuar interesat kombëtare në nivele më të ulëta, gjë që mua personalisht dhe për atë që kam folur në media prej vitesh, interesat shtetërore të Serbisë janë më të përshtatshme për një shtet shumëkombësh.

“Për mua më e rëndësishmja është që në fazën fillestare qytetarët e të dyja palëve në mosmarrëveshje të ndjejnë efektet e marrëveshjes dhe para së gjithash qarkullimin e lirë të mallrave të njerëzve, bashkëpunimin në arsim, shëndetësi, regjistrim, në fusha e dokumenteve, bashkëpunimi policor… Ndërmjetësimi, i cili duhet të çojë në një kompromis, është një proces kompleks dhe derisa të dyja palët të arrijnë marrëveshje për çdo çështje, publikut do t’i duket se diçka po fshihet, por nuk është kështu. Këto janë metodat e zakonshme të ndërmjetësve me pëlqimin e palëve negociuese.Përshëndetje të ngrohta për lexuesit tuaj”, përfundon Misha Iliq.