Hoxha Musa Vila e quan “mrekulli hyjnore”: Pretendon se përmbytja në Nepal u qetësua në zonat myslimane

Përmbytjet katastrofike në Nepal kanë nxitur edhe interpretime fetare në rrjetet sociale.

Dr. Musa Vila ka publikuar pamje nga zonat e prekura, duke pretenduar se ujërat e furishme janë tërhequr dhe janë qetësuar pasi kanë arritur në zona të banuara nga myslimanë.

Në postimin e tij, Vila e lidh ngjarjen me ajetin kuranor nga surja Hud, 44: “Uji u tërhoq dhe çështja mori fund”, duke e cilësuar situatën si një “mrekulli hyjnore”.

Sipas tij, banorët e kanë përjetuar tërheqjen e ujit si shenjë të mëshirës së Zotit dhe kanë shpërndarë pamje të zonave pas kalimit të valës së përmbytjes.

Megjithatë, nuk ka të dhëna të pavarura që vërtetojnë se përmbytja është qetësuar pikërisht për shkak se ujërat kanë arritur në zona myslimane. Tërheqja e shpejtë e ujit është një fenomen i zakonshëm pas kalimit të një vale të përmbytjes së menjëhershme.

Kështu, ndërsa pamjet dhe katastrofa në Nepal janë reale, interpretimi i tyre si “mrekulli hyjnore” mbetet çështje besimi dhe interpretimi fetar, dhe jo një fakt i vërtetuar.

Postimi i Vilë-s ka marrë vëmendje në rrjetet sociale, duke hapur diskutime mes atyre që e shohin ngjarjen përmes besimit fetar dhe atyre që kërkojnë një shpjegim natyror për tërheqjen e ujërave.