Uji në Gostivar sërish i pijshëm! Hiqet ndalesa, vazhdon hetimi

Me një dolli uji nga një çezmë publike para Komunës së Gostivarit, zyrtarët shtetërorë dhe lokalë përcollën mesazhin se uji në këtë qytet tashmë është i sigurt dhe mund të konsumohet.

Pas thuajse 30 ditësh nga momenti kur Agjencia e Ushqimit dhe Veterinarisë ndaloi përdorimin e ujit për pije e pastrim, sot kjo ndalesë u hoq zyrtarisht. Drejtori i AUV-së, Oliver Millanov, konfirmoi se uji prej sot mund edhe të pihet.

Por pse nuk u dha alarmi më herët për qytetarët e Gostivarit, që të mos vinte deri te helmimet e shumta? Nga Shtabi lokal i krizës konfirmojnë se ndërmarrja komunale ka pasur kontratë me Qendrën për Shëndet Publik që uji të analizohej dy herë në javë.

Nga ana tjetër, drejtori i Qendrës për Shëndet Publik në Tetovë, Shaqir Zulbeari, thotë se analizat janë bërë dhe tashmë ndodhen në prokurori, duke pranuar se disa prej tyre kanë dalë në rregull e disa jo.

Sipas Prokurorisë, në rezervuarin e Gostivarit pompat që helmuan ujin janë vendosur më 25 qershor, ndërsa pacientët e parë në spitalin e Gostivarit u paraqitën më 14 korrik, rreth 20 ditë më pas. Agjencia e Veterinarisë e ndaloi ujin për pije më 17 korrik, ndërsa më 18 korrik u arrestua drejtoresha e ndërmarrjes bashkë me dy bashkëpunëtorë të saj. Mbi 4 mijë qytetarë u paraqitën në spitale me shqetësime shëndetësore për shkak të ujit të kontaminuar.