Policia me radarë do të “gjuajë” ngasësit e trotineteve elektrikë: Ndryshojnë rregullat dhe ashpërsohen gjobat
Përmes kontrolleve të rregullta dhe aksioneve të jashtëzakonshme, si dhe me përdorimin e radarëve, policia do të kapë shkelësit e rregullave të trafikut që ngasin trotinete elektrikë.
Në këtë mënyrë, siç njoftojnë nga Ministria e Punëve të Brendshme (MPB), do të zbatohen ndryshimet në Ligjin për Sigurinë në Trafikun Rrugor, me të cilat rregullohet lëvizja e trotineteve elektrikë në trafikun publik.
Nga MPB bëjnë të ditur se kontrollet realizohen gjatë punës së rregullt, por edhe përmes aksioneve ku policët do të vëzhgojnë drejtpërdrejt ose do të përdorin pajisje teknike me qëllim të rritjes së sigurisë në rrugë. Nëse gjatë kontrolleve vërtetohet se shkelësi është fëmijë, do të merren masa në përputhje me dispozitat e Ligjit për Drejtësinë për Fëmijët.
Rregullat e reja dhe kufizimet kryesore
Me miratimin e ndryshimeve ligjore, ndryshojnë rrënjësisht rregullat për përdoruesit e këtyre mjeteve:
Shpejtësia maksimale: Kufizohet në 20 kilometra në orë, në vend të 25 sa ishte deri më tani.
Ndalimi për të miturit: Të miturve u ndalohet plotësisht ngasja e trotineteve elektrikë.
Transporti i personave: Ndalohet rreptësisht mbajtja e dy personave në një trotinet.
Megjithatë, nga MPB pranojnë se ende nuk e dinë saktësisht se si do të kontrollohet procesi i marrjes me qira të trotineteve, praktikë kjo shumë e përhapur te të miturit. Mbetet e paqartë nëse do t’u kërkohet kompanive që ofrojnë këtë shërbim ta kufizojnë shpejtësinë në 20 km/h apo si do të veprohet me konfiskimin e mjetit nëse dikush kapet duke shkelur rregullat me një trotinet të marrë me qira.
Gjobat dhe konfiskimi i trotineteve
Ndryshimet ligjore ashpërsojnë ndjeshëm politikën ndëshkimore. Janë paraparë gjoba të larta në para që mund të arrijnë deri në 275 euro, varësisht nga lloji i shkeljes.
Përveç gjobës, në raste të caktuara parashihet edhe konfiskimi i trotinetit elektrik. Ky masë do të zbatohet nëse:
Trotineti ngitet nga një i mitur.
Tejkalohet shpejtësia e lejuar.
Në trotinet transportohen dy persona.
Drejtuesi është nën ndikimin e alkoolit.
Këto dispozita që specifikojnë konfiskimin vlejnë për ngasësit që janë 18 vjeç e lart, të cilëve tashmë u vendosen detyrime të qarta ligjore për menaxhimin e këtij mjeti.
Çfarë ndalohet tjetër?
Sipas dispozitave të reja që hyjnë në Ligjin për Sigurinë në Trafik, ngasësi i një mjeti të lehtë elektrik nuk guxon të lëvizë në mënyrë që zvogëlon stabilitetin e mjetit apo rrezikon pjesëmarrësit e tjerë. Veçanërisht ndalohet:
Heqja e duarve nga timoni.
Mbajtja apo kapja pas një automjeti tjetër.
Ngasja vetëm me një rrotë.
Transportimi, tërheqja apo shtyrja e sendeve të ndryshme.
Ngasja nën ndikimin e alkoolit ose kur personi shfaq shenja të çrregullimit nga alkooli.
