4-vjeçari milioneri më i ri në Maqedoni

Pak më pak se 190.000 euro në muaj është paga më e lartë bruto në vend, e cila është paguar gjatë vitit të kaluar, 2025, që do të thotë se për të gjithë atë vit ajo ka arritur rreth 2,2 milionë euro. Këtë e tregoi raporti i Drejtorisë së të Ardhurave Publike, nga ku thonë se paga e fituar është në sektorin e nxjerrjes së qymyrit. Drejtoresha e DAP-it, Elena Petrova, prezantoi të dhëna për të ardhurat më të larta individuale.

“Interesante janë të dhënat për të ardhurat më të larta individuale. Paga më e lartë vjetore bruto arrin në 139,1 milionë denarë, ndërsa dividendi më e lartë është 252,6 milionë denarë, kurse fitimi më i lartë kapital është 164,2 milionë denarë. Të ardhurat më të larta nga veprimtaria e pavarur janë 157,9 milionë denarë”, deklaroi Elena Petrova, drejtoreshë e DAP-it.

Sipas të dhënave të DAP-it për vitin e kaluar, një fëmijë katërvjeçar, me 3,1 milionë denarë të ardhura nga dividenda, është milioneri më i ri në vend, ndërsa më i moshuari është një pensionist 97-vjeçar me 1,089 milionë denarë.

“Personi më i ri që ka realizuar të ardhura të tilla është një fëmijë 4-vjeçar, i cili ka realizuar të ardhura nga dividendë të paguara nga një bankë, ndërsa qytetari më i moshuar me të ardhura mbi një milion denarë është një pensionist me të ardhura prej 1,1 milion denarësh nga pensioni, i cili nuk është e ardhura e tij e vetme”, tha më tej Petrova.

Petrova informoi gjithashtu se paga më e lartë në vitin 2025 është rreth 2 për qind më e lartë se ajo e vitit paraprak. Të pesë pozicionet me pagat më të larta, të cilat kanë tejkaluar dy milionë euro në shumën bruto, janë paguar në Shkup, ndërsa dividendi më i lartë, prej 4 milionë eurosh, është deklaruar në Gjevgjeli. Ndër sektorët me pagat më të larta janë farmacitë, tregtia me duhan, ushqime dhe pije, më pas spitalet, si dhe tregtia me shumicë e produkteve farmaceutike.