Dronët iranianë Shahed, mjetet fluturuese pa pilot që po sfidojnë mbrojtjen ajrore

Dronët iranianë Shahed janë mjete fluturuese pa pilot që përdoren për sulme ushtarake dhe shpesh quhen edhe “dronë kamikazë”, sepse fluturojnë drejt objektivit dhe shpërthejnë në momentin që e godasin.

Ata prodhohen nga Irani dhe lëshohen zakonisht nga platforma në tokë, ndërsa programohen paraprakisht për të goditur një objektiv të caktuar. Këta dronë mund të fluturojnë qindra apo edhe mijëra kilometra dhe mbajnë eksploziv që shpërthen kur arrijnë objektivin.

Një nga arsyet pse janë bërë kaq të përdorur është kostoja e ulët, pasi janë shumë më të lirë se raketat dhe mund të prodhohen në numër të madh. Për këtë arsye përdoren shpesh në sulme masive për të mbingarkuar sistemet e mbrojtjes ajrore të armikut. Rusia i ka përdorur gjerësisht kundër Ukrainës që nga viti 2022, ndërsa variante të tyre janë përdorur edhe në Lindjen e Mesme.

Ekspertët paralajmërojnë se këta dronë janë bërë problem për shumë vende sepse janë të lirë për t’u prodhuar, mund të përdoren në numër të madh dhe teknologjia e tyre po përhapet gjithnjë e më shumë, duke rritur rrezikun që të përdoren në konflikte të ndryshme ose kundër infrastrukturës civile.