Lista Serbe thotë se i ka fituar të gjitha ulëset e serbëve

Lista Serbe ka fituar të gjitha ulëset e rezervuara për komunitetin serb, ka deklaruar kryetari i kësaj partie, Zllatan Ellek të dielën pas zgjedhjeve të parakohshme parlamentare.

Sipas rezultateve nga procesimi i më shumë se 99 për qind të vendvotimeve, Lista Serbe ka marrë 41 mijë e 335 vota.

Partia e Nenad Rashiqit deri tash ka marrë 4601 vota.

Ndërkaq Kosovski Savez ka marrë 541 vota.

Nga kjo llogaritje, për të marrë një ulëse duhen 4648 vota.

Rashiq pati siguruar një ulëse në zgjedhjet e shkurtit. Si i vetmi deputet i partisë së tij, ai u zgjodh nënkryetar nga komuniteti serb, pas refuzimit të shumicës së Kuvendit për të votuar propozimet nga Lista Serbe.