Rriten tensionet, EUFOR shton ushtarët në Bosnje dhe Hercegovinë

Misioni i Forcës së Bashkimit Evropian (EUFOR) Althea në Bosnje dhe Hercegovinë pritet të përforcohet me 400 ushtarë shtesë dhe katër helikopterë, si përgjigje ndaj situatës politike në përshkallëzim në vend. Trupat e reja pritet të mbërrijnë më 12 ose 13 mars, raportojnë mediat vendase. Përforcimi do të përbëhet nga 120 ushtarë nga Hungaria, 120 nga Rumania dhe 120 nga Bullgaria, ndërsa pjesa tjetër do të vijë nga Sllovenia. Ky vendim është marrë ndërsa EUFOR vlerëson zhvillimet aktuale në Bosnjë e Hercegovinë veçanërisht në dritën e veprimeve të fundit të autoriteteve në Republika Srpska (RS). Kriza u përshkallëzua kur punonjësit e Agjencisë Shtetërore për Hetim dhe Mbrojtje (SIPA) në Zyrën Rajonale në Banja Luka braktisën vendet e punës pas urdhrave nga Ministria e Brendshme e RS. Ky veprim pasoi një sërë masash antikushtetuese nga autoritetet e RS, duke përfshirë ligjet e firmosura nga Presidenti i RS, Milorad Dodik, të cilat do të ndalonin funksionimin e institucioneve shtetërore në këtë entitet. Në përgjigje të tensioneve në rritje, disa zyrtarë në nivel shtetëror kanë kërkuar ndërhyrjen e EUFOR-it si garantues i zbatimit ushtarak të Marrëveshjes së Paqes së Dejtonit. Ndërkohë, Dodik ka kërkuar nga EUFOR të ndalojë personat nga Federata që synojnë të hyjnë në territorin e Republika Sërpskës.