Mickoski nga Çeshinova-Oblesheva: Zhvillimi i çdo komune nënkupton një të ardhme më të mirë për qytetarët

Kryeministri Hristijan Mickoski ka paralajmëruar një thirrje të re për financimin e projekteve të komunave nga buxheti qendror gjatë vitit të ardhshëm, ndërsa zgjidhja e problemit me furnizimin me ujë në Komunën e Çeshinovës-Obleshevës do të jetë një nga prioritetet e Qeverisë.

Gjatë vizitës në Komunën e Çeshinovës-Obleshevës, ku u promovua një rrugë e sapoasfaltuar, kryeministri Mickoski vlerësoi punën e kryetarit të komunës dhe theksoi se Qeveria do të vazhdojë të mbështesë projekte që përmirësojnë cilësinë e jetës së qytetarëve.

Ai u bëri thirrje autoriteteve komunale që t’i përgatisin sa më shpejt projektet e reja, duke paralajmëruar se vitin e ardhshëm Qeveria planifikon të hapë një thirrje të re për financimin e projekteve të vetëqeverisjes lokale nga buxheti qendror.

“Do ta inkurajoja kryetarin e komunës që t’i përgatisë projektet sa më shpejt, sepse vitin e ardhshëm, si Qeveri, planifikojmë një thirrje të re, me të cilën nga buxheti qendror do të financojmë projekte për vetëqeverisjen lokale, për komunat”, deklaroi Mickoski.

Furnizimi me ujë, një nga prioritetet

Një nga çështjet kryesore për të cilat u diskutua gjatë takimit ishte zgjidhja e problemit me furnizimin me ujë në një pjesë të madhe të vendbanimeve të komunës.

Mickoski tha se Qeveria pret mjete shtesë në kuadër të Agjendës së Reformave, përtej 750 milionë eurove të siguruara më parë. Sipas tij, një pjesë e këtyre mjeteve mund të orientohen drejt projekteve prioritare, përfshirë zgjidhjen e problemit me ujësjellësin në Çeshinovë-Obleshevë.

Kryeministri theksoi se projekti do të përfshihet në listën indikative të prioriteteve të Qeverisë, në përputhje me dinamikën e bashkëpunimit me Bashkimin Evropian. Sipas tij, miratimi përfundimtar i kësaj liste pritet të bëhet në gjysmën e parë të vitit të ardhshëm.

Ai shtoi se, ndërkohë, komuna duhet të vazhdojë me përgatitjen e projekteve, ndërsa Qeveria qendrore do të shqyrtojë mundësinë e ofrimit të mbështetjes shtesë.

Në fund, Mickoski përgëzoi kryetarin e komunës për punën e bërë, falënderoi këshilltarët komunalë dhe deputetët e rajonit për angazhimin e tyre, si dhe mediat për përcjelljen e projekteve që synojnë përmirësimin e kushteve të jetesës së qytetarëve.