Zvicra vendos kushte më të rrepta për punëtorët e huaj: Planifikohet taksë nga 2.000 deri në 4.000 franga

Dhoma e lartë e parlamentit zviceran (Këshilli i Shteteve) ka votuar një propozim për vendosjen e një takse nxitëse për imigracionin e fuqisë punëtore nga Bashkimi Evropian, me një shumë minimale prej 2.000 deri në 4.000 franga zvicerane.

Mekanizmi është konceptuar si pjesë e klauzolës së re mbrojtëse në kuadër të paketës negociuese të marrëveshjeve midis Zvicrës dhe BE-së.

Është paraparë që taksën për punëtorët e huaj ta paguajnë drejtpërdrejt kompanitë që i punësojnë ata, me qëllim që të nxiten punëdhënësit të punësojnë me prioritet fuqi punëtore vendase. Nga ana tjetër, anëtarët e rritur të familjes që vijnë përmes procedurës së bashkimit familjar, do t’i bartin vetë shpenzimet e kësaj takse.

Të ardhurat e mbledhura nga kjo taksë do t’u rishpërndahen qytetarëve të Zvicrës.

Si do të funksionojë klauzola mbrojtëse?

Shtetasit e vendeve të treta: Pas aktivizimit të mundshëm të klauzolës mbrojtëse, taksa do të zbatohej automatikisht edhe për punëtorët që vijnë nga vendet jashtë BE-së.

Kushti për aktivizim: Mekanizmi do të aktivizohet nëse Zvicra përballet me çrregullime serioze ekonomike ose sociale të shkaktuara nga fluksi i tepërt i imigrantëve.

Analiza vjetore: Sipas propozimit të miratuar, Këshilli Federal (Qeveria e Zvicrës) do të ketë obligim që çdo vit të analizojë gjendjen dhe nevojën për aktivizimin e klauzolës mbrojtëse.

Debatet dhe dyshimet në parlament

Edhe pse mbështetësit konsiderojnë se taksa do të mbrojë ekonominë vendase, propozimi përballet me kritika në qarqet politike. Një pjesë e deputetëve të qendrës dhe të djathtës nga pjesa franofone e Zvicrës, si dhe përfaqësues të së majtës, shprehën dyshime për efikasitetin e masës dhe paralajmëruan se ajo mund të krijojë vetëm pengesa shtesë administrative për biznesin.

Projektligji në fazën e ardhshme duhet të kalojë edhe harmonizimet shtesë në Domën e ulët të parlamentit.