“Pse duhet vizituar Shqipëria?”/ Rama në Samitin e Euronews, flet për transformimin e vendit: Nga 2 mln turistë, sot kemi 12 mln. Objektivi ynë, bota

Kryeministri Edi Rama ka folur për potencialin turistik të Shqipërisë, investimet dhe objektivat për të ardhmen, gjatë pjesëmarrjes në Samitin e Euronews 2026.

Duke e cilësuar Shqipërinë si një destinacion që tashmë po tërheq turistë nga vende të ndryshme të botës, Rama tha se synimi është zgjerimi i mëtejshëm i tregut turistik ndërkombëtar.

Ai veçoi pasuritë natyrore, sigurinë, mikpritjen dhe larminë që ofron vendi, ndërsa solli në vëmendje rritjen e numrit të turistëve, nga rreth 2 milionë në fillim të këtij transformimi, në 12 milionë të huaj vitin e kaluar.

Pjesë nga intervista:

Pse duhet që dikush të vizitojë Shqipërinë?

Rama: Pse? Sepse të gjithë e vizitojnë Shqipërinë. Nëse nuk viziton Shqipërinë, je ndër të paktët që nuk e viziton.

Edhe fqinjët tuaj janë në treg, çfarë ju bën konkurrues?

Rama: Fqinjët e kanë bërë para nesh, tani duhet ta bëjmë ne. Tashmë mund t’i tregojmë botës të cilët jemi me të vërtetë, përveç stereotipeve që na kanë përndjekur.

A ka një treg të veçantë që synoni?

Rama: Vijmë nga histori të ndryshme. Kur Kroacia ishte destinacion, ne ishim vendi më i izoluar i Evropës, ishim Koreja e Veriut e Evropës. Pasi dolëm nga ai ferr, u përballëm me stereotipe shqetësuese. Tani ka ardhur radha jonë. Cili është synimi? Bota.

Cila është ideja për Shqipërinë?

Rama: Ka patjetër një plan, po punojmë në bazë të një plani. Ajo çfarë kam mësuar nga e gjithë kjo betejë, që në fund të fundit, që të ndryshosh emrin, duhet të ndryshosh vendin, është një nga vendet më të sigurta në botë, cilësia e jetës.

Kemi ushqim të shijshëm, njerëz mikpritës dhe në një hapësirë të vogël, brenda perimetrit tonë, kemi 2 detë dhe 9 lumenj, male të mrekullueshme. Ka kaq shumë larmi, saqë brenda një jave mund të përjetosh kaq shumë gjëra. Jemi shumë të lumtur që shohim kaq shumë turistë spanjollë.

Ç’lloj klientësh shihni? Më shumë evropianë apo amerikanë?

Rama: Objektivi ynë është bota. Pse? Sepse po zbulojmë që pjesët e botës po arrijnë pjesë në këtë rritje. Kur nisëm këtë udhëtim transformues, numëronim 2 mln turistë. Paraardhësi im ishte turist kur u kthye në Shqipëri, 2 mln, përfshirë shqiptarët. Ndërkohë, vitin e kaluar përfunduam me 12 mln të huaj, me japonezë, australianë, kinezë, izraelitë. Është një turmë shumë e larmishme.