Drejtoria e Doganave, me mbështetjen e BE-së, forcon kapacitetet për luftën kundër krimit të organizuar dhe lehtësimin e tregtisë

Drejtoria e Doganave sot, në terminalin doganor Tabanoc, prezantoi rezultatet e aktiviteteve të realizuara me mbështetje financiare nga Bashkimi Evropian, në kuadër të Dokumentit të Veprimit IPA 2021 „BE-ja kundër krimit të organizuar, në mbështetje të tregtisë“.
Në këtë ngjarje, nikoqir i së cilës ishte drejtori i Drejtorisë së Doganave, Boban Nikollovski, mori pjesë dhe mbajti fjalim edhe kryetari i Qeverisë së Republikës së Maqedonisë së Veriut, prof. dr. Hristijan Mickoski. Fjalime mbajtën gjithashtu ministrja e Financave, Gordana Dimitrieska-Koçoska, dhe ambasadori i Bashkimit Evropian në vend, Mihalis Rokas.
Përmes mbështetjes së Bashkimit Evropian, në vlerë prej rreth 4 milionë eurosh, gjatë periudhës së kaluar Drejtoria e Doganave ka forcuar kapacitetet e saj operative, hetimore dhe teknologjike. Janë siguruar 26 automjete të specializuara, prej të cilave 21 për ekipet doganore mobile dhe 5 për njësinë K-9, si dhe pajisje të specializuara për kontrollin dhe hetimet doganore, pajisje për zbulimin e tregtisë së paligjshme, pajisje forenzike dhe infrastrukturë informatike.
„Këto nuk janë vetëm mjete materiale. Këto janë mjete me të cilat punonjësit tanë doganorë çdo ditë do të mund ta kryejnë punën e tyre në mënyrë më efikase – të identifikojnë rreziqet, të parandalojnë tregtinë e paligjshme, të zbulojnë kontrabandën dhe të kontribuojnë në luftën kundër krimit të organizuar dhe ndërkufitar“, theksoi drejtori i Drejtorisë së Doganave, Boban Nikollovski.
Përveç forcimit të kapaciteteve për kontroll dhe hetime, një pjesë e rëndësishme e mbështetjes evropiane është orientuar edhe drejt digjitalizimit dhe lehtësimit të tregtisë legale.
Në kuadër të projektit janë zhvilluar EORI2 – sistemi për regjistrimin dhe identifikimin e operatorëve ekonomikë – dhe UUM&DS – sistemi për menaxhimin e unifikuar të identiteteve të përdoruesve dhe nënshkrimit digjital. Me futjen e tyre në përdorim mundësohet qasje më e thjeshtë dhe më e sigurt e operatorëve ekonomikë në shërbimet elektronike doganore, reduktimi i procedurave administrative dhe lidhje më e mirë me sistemet doganore kombëtare dhe evropiane.
„Një doganë e fortë nuk nënkupton vetëm kontroll të fortë. Një doganë e fortë nënkupton edhe një institucion të shpejtë, modern dhe digjital, i cili u mundëson operatorëve ekonomikë të funksionojnë më lehtë. Siguria dhe lehtësimi i tregtisë janë dy nga prioritetet tona kryesore, të cilat plotësojnë njëra-tjetrën“, deklaroi Nikollovski.
„Duhet të tregojmë se krimi është një profesion që nuk shpërblehet. Drejtoria e Doganave është në vijën e parë të mbrojtjes së ligjit dhe sundimit të së drejtës dhe duhet të ecë në atë drejtim. Kjo Qeveri ka një synim serioz dhe të qartë për t’u dalë përpara të gjithë atyre që kanë zgjedhur të jenë aleatë të krimit“, deklaroi kryetari i Qeverisë, prof. dr. Hristijan Mickoski.
„Sot jemi këtu në pikën kufitare për të parë rezultatet konkrete të një tjetër projekti të rëndësishëm, të realizuar me mbështetjen e BE-së, në vlerë prej 4 milionë eurosh. Rëndësia e tij është shumë më e madhe se vlera e pajisjeve të blera. Ky është një investim në një institucion që ka rol jashtëzakonisht të rëndësishëm për shtetin – në mbrojtjen e interesave financiare, në luftën kundër krimit të organizuar dhe ndërkufitar, por njëkohësisht edhe në krijimin e kushteve për tregti më të shpejtë dhe më të thjeshtë. E gjithë kjo nënkupton kushte më të mira pune për punonjësit doganorë, mobilitet më të madh dhe kapacitete më të mira për zbulimin dhe parandalimin e tregtisë së paligjshme dhe krimit ndërkufitar“, theksoi ministrja e Financave, Gordana Dimitrieska-Koçoska.
„Pajisjet e specializuara për njësitë doganore mobile, hapësira e përmirësuar e serverëve në Drejtorinë e Doganave dhe sistemi i ri IT për regjistrimin e operatorëve ekonomikë janë investime praktike. Ky është lloji i integrimit evropian që qytetarët mund ta shohin dhe ta ndiejnë: një pikë kufitare që funksionon më mirë, mallra që qarkullojnë më shpejt, biznese që përballen me më pak pengesa dhe punonjës doganorë që kanë në dispozicion mjetet e nevojshme për të garantuar sigurinë e qytetarëve“, theksoi ambasadori i BE-së në vend, Mihalis Rokas.
Drejtoria e Doganave vazhdon me modernizimin dhe digjitalizimin e punës së saj, zhvillimin e kapaciteteve njerëzore dhe avancimin e bashkëpunimit operacional dhe ndërkombëtar, me qëllim harmonizimin e mëtejshëm me standardet evropiane dhe ndërtimin e një shërbimi doganor modern, profesional, efikas dhe të sigurt.
Mbështetja nga Bashkimi Evropian përfaqëson një kontribut të rëndësishëm në forcimin e kapaciteteve të Drejtorisë së Doganave dhe në krijimin e kushteve për mbrojtje më efikase të interesave ekonomike dhe financiare të shtetit, por edhe për zhvillimin më të shpejtë dhe më të thjeshtë të tregtisë legale.