SHBA afat Hamasit për çarmatosjen, Kushner: Nëse refuzon, Izraeli do të ketë mbështetje për sulme të reja

Shtetet e Bashkuara i kanë dhënë Hamasit një afat prej 60 deri në 90 ditësh për të nisur procesin e çarmatosjes në Gaza, ndërsa paralajmërojnë se dështimi për të përmbushur këtë angazhim mund të sjellë mbështetje më të madhe për veprime të reja ushtarake izraelite.

I dërguari special i SHBA-së, Jared Kushner, deklaroi për Fox News se nëse Hamasi heq dorë vullnetarisht nga armët dhe nis nxjerrjen e tyre nga tunelet, mund të krijohen kushtet për një përparim të shpejtë drejt paqes.

Kushner tha se hapat e parë mund të ndërmerren brenda 30 ditëve, ndërsa brenda 60-90 ditëve pritet të trajtohet edhe rrjeti i tuneleve.

Sipas tij, nëse Hamasi nuk zbaton angazhimet e marra, Izraeli do të ketë një mbështetje shumë më të madhe nga SHBA-ja dhe vende të tjera për të ndërmarrë veprime të mëtejshme.

Kushner u shpreh gjithashtu se përfaqësuesit e Hamasit gjatë takimit të së dielës dhanë sinjale pozitive, por Uashingtoni mbetet skeptik për shkak të historikut të organizatës. Tashmë, sipas tij, Hamasi do të duhet të dëshmojë me veprime nëse është realisht i gatshëm të ecë drejt një procesi paqeje.

I dërguari amerikan zhvilloi një takim rreth katërorësh me kryeministrin izraelit Benjamin Netanyahu, ku u diskutuan çështje të sigurisë së Izraelit, e drejta e tij për t’u mbrojtur dhe planet për rindërtimin e Gazës.

Kushner e cilësoi takimin me Netanyahun si “shumë të mirë”, duke theksuar se tani fokusi është te zbatimi konkret i angazhimeve të marra nga palët.