Sifilizi te gratë, simptomat që po neglizhohen

Rastet e sifilizit te gratë janë rritur ndjeshëm gjatë dekadës së fundit, ndërsa ekspertët paralajmërojnë se shumë infeksione mund të mbeten pa u diagnostikuar, pasi simptomat shpesh janë të lehta, të paqarta dhe ngatërrohen me probleme të tjera shëndetësore.

Edhe pse shumica e rasteve në Mbretërinë e Bashkuar vazhdojnë të regjistrohen te burrat që kryejnë marrëdhënie seksuale me burra, përqindja e rasteve te gratë është rritur ndjeshëm. Të dhënat më të fundit të UK Health Security Agency tregojnë se gratë përbënin pak më shumë se gjashtë për qind të të gjitha diagnozave të sifilizit vitin e kaluar, duke shënuar një rritje prej mbi 200 për qind në krahasim me dhjetë vite më parë.

Ekspertët thonë se shumë raste te gratë kalojnë pa u vënë re, sepse shenjat e para të infeksionit janë shpesh të fshehura. Plagët pa dhimbje, që janë një nga simptomat e hershme, mund të shfaqen në zona të brendshme ose të vështira për t’u parë. Edhe kur vërehen, ato shpesh ngatërrohen me herpes, infeksione mykotike, qime të rritura nën lëkurë apo irritime të thjeshta.

Me përparimin e sëmundjes, mund të shfaqen skuqje në pëllëmbët e duarve dhe shputat e këmbëve. Edhe këto simptoma mund të interpretohen gabimisht si ekzemë, psoriazë, dermatit apo reaksion alergjik.

Studimet kanë treguar se në disa raste sifilizi mund të shkaktojë edhe rënie të flokëve, e njohur si alopecia sifilitike. Një grua në të njëzetat, e cila ka zgjedhur të mbetet anonime, tregoi se për më shumë se dy vite ishte diagnostikuar gabimisht, para se mjekët ta testonin më në fund për sifiliz.

Ajo tha se po përballej me një sërë simptomash të rënda, përfshirë rënie flokësh dhe “mjegull mendore” aq të fortë sa mjekët nisën ta kontrollonin për sëmundje autoimune. Sipas saj, ndryshimet në gjendjen emocionale dhe në personalitet e bënë të mendonte se po kalonte një krizë të shëndetit mendor.

“U deshën dy vite që një mjek të më testonte për sifiliz. Mendoja se ishte një sëmundje e së kaluarës, jo diçka që mund të më prekte mua”, u shpreh ajo.

Studiues nga Brighton and Sussex Medical School kanë identifikuar vonesa të ngjashme në diagnostikim, pasi analizuan disa raste brenda një strukture të NHS. Në disa prej tyre, pacientët kishin pasur simptoma serioze, si absces, inflamacion të nyjeve, humbje peshe, humbje dëgjimi, dëmtime nervore dhe rezultate jonormale të funksionit të mëlçisë, por testimi për sifiliz nuk ishte bërë menjëherë.

Sifilizi shpesh quhet “imituesi i madh”, sepse mund të ngjajë me shumë sëmundje të tjera. Kjo bën që disa pacientë t’i nënshtrohen ekzaminimeve të panevojshme, ndonjëherë edhe invazive, para se të merret diagnoza e saktë.

Megjithëse sifilizi trajtohet lehtë kur zbulohet në kohë, infeksioni i patrajtuar mund të çojë në komplikime serioze. Rreziku është veçanërisht i madh gjatë shtatzënisë, pasi sifilizi kongjenital mund të shkaktojë sëmundje të rënda ose vdekje te foshnjat. Për këtë arsye, kontrolli për sifiliz rekomandohet për të gjitha gratë shtatzëna.

Nga viti 2020 deri në vitin 2024, më shumë se 1,300 gra shtatzëna në Angli janë diagnostikuar me sifiliz.

Valentina Milanova, themeluese e kompanisë së shëndetit të grave Daye, tha se stigma dhe keqkuptimet rreth testimit për infeksione seksualisht të transmetueshme po bëjnë që shumë raste të mos zbulohen në kohë. Sipas saj, testimi shpesh shihet si diçka që bëhet vetëm pas një shqetësimi konkret, dhe jo si pjesë normale e kujdesit parandalues shëndetësor.

Ajo theksoi se shumë infeksione mund të ekzistojnë pa simptoma të dukshme, ndërkohë që vazhdojnë të ndikojnë në trup. Për këtë arsye, shëndeti seksual duhet trajtuar njësoj si çdo pjesë tjetër e kujdesit rutinë mjekësor, pa turp dhe pa paragjykime.