Mickoski: Qeveria është fuqishëm e përkushtuar ndaj modernizimit të administratës publike, digjitalizimit të shërbimeve, uljes së procedurave burokratike dhe institucione që do të jenë më afër qytetarëve

Për mua është një nder dhe kënaqësi e veçantë që sot, me rastin e Ditës së Administratës Publike, t’u drejtohem njerëzve që janë ndër mbajtësit më të rëndësishëm të funksionimit të shtetit, njerëzve që ndoshta nuk janë gjithmonë në qendër të vëmendjes së opinionit, por që çdo ditë, përmes punës së tyre, dijes së tyre dhe përgjegjësisë së tyre, mundësojnë që institucionet të funksionojnë, ligjet të zbatohen dhe shërbimet të arrijnë deri te qytetarët. Sot nuk shënojmë vetëm një festë profesionale. Sot i japim mirënjohje një shërbimi që është shtyllë e çdo shteti bashkëkohor dhe të suksesshëm. Sepse shteti nuk është vetëm Qeveria, nuk është vetëm Kuvendi, nuk janë vetëm ministrat dhe funksionarët e zgjedhur. Shteti janë edhe mijëra njerëz që çdo mëngjes hapin dyert e institucioneve, që përgatisin vendimet, zbatojnë ligjet, u shërbejnë qytetarëve dhe sigurojnë që sistemi të funksionojë, tha Hristijan Mickoski, Kryetar i Qeverisë, në ngjarjen e sotme “Dita e nëpunësve publikë”.

Dhe pikërisht për këtë sot dua të flas hapur si për sfidat, ashtu edhe për mundësitë që qëndrojnë para nesh. Jam i vetëdijshëm se kur përmendet administrata publike, te një pjesë e qytetarëve jo gjithmonë shfaqen ndjenja pozitive. Jam i vetëdijshëm se ekzistojnë kritika, se ka pakënaqësi dhe se shumëkush pret shërbime më të shpejta, më cilësore dhe më efikase nga institucionet. Dhe nuk do të ishte e ndershme sot, në këtë ditë, të shtiremi sikur ato kritika nuk ekzistojnë. Por, po ashtu do të ishte e padrejtë dhe e pasaktë nëse e gjithë përgjegjësia do të tentohej të vendosej mbi njerëzit që punojnë në administratë. Sepse ky perceptim nuk është krijuar dje, as vitin e kaluar, por është rezultat i një procesi që ka zgjatur me vite, madje edhe me dekada. Rezultat i një sistemi që për shumë kohë ka qenë i ngarkuar me burokraci, me procedura të vjetruara, me digjitalizim të pamjaftueshëm, me kritere të paqarta për avancim dhe me praktika që shpesh më shumë e kanë mbrojtur formën sesa përmbajtjen. Për shumë kohë qytetarët janë përballur me institucione ku për një shërbim të thjeshtë duheshin ditë, javë apo muaj. Për shumë kohë është krijuar ndjenja se sistemi është i komplikuar, i ngadalshëm dhe i paarritshëm. Dhe ajo ndjenjë me kalimin e kohës u shndërrua në mosbesim. Por, kur flasim për atë mosbesim, duhet të jemi të sinqertë dhe të themi se problemi nuk ka qenë vetëm tek njerëzit. Problemi ka qenë në mënyrën se si sistemi është vendosur dhe ndërtuar ndër vite. Pikërisht për këtë, detyra jonë sot nuk është të kërkojmë fajtorë për dobësitë e djeshme, por të krijojmë zgjidhje për sukseset e së nesërmes, shtoi Mickoski.

Kryeministri Mickoski theksoi se detyra e Qeverisë dhe e institucioneve është të ndërtojnë një administratë që do të jetë shërbim të qytetarëve, e jo pengesë burokratike përpara nevojave të tyre.

Detyra jonë është të ndërtojmë një administratë që do të jetë shërbim të qytetarëve, e jo pengesë burokratike përpara nevojave të tyre. Një administratë që do të njihet për shpejtësinë e shërbimit, për mirësjelljen në marrëdhënie, për profesionalizmin në punë dhe për efikasitetin në zgjidhjen e problemeve. Një administratë që nuk do të jetë simbol i pritjes, por simbol i zgjidhjes. Bota sot po ndryshon me një shpejtësi të madhe. Teknologjitë e reja po ndryshojnë ekonomitë, po transformojnë institucionet dhe po krijojnë pritshmëri të reja te qytetarët. Njerëzit sot me të drejtë presin që shërbimet që i marrin nga shteti të jenë po aq të shpejta dhe të thjeshta sa shërbimet që i marrin nga sektori privat, theksoi ai dhe shtoi se reformat në administratën publike nuk janë çështje të zgjedhjes politike, por çështje domosdoshmërie.

Pikërisht për këtë, reformat në administratën publike nuk janë çështje të zgjedhjes politike. Ato janë çështje domosdoshmërie. Nuk mund të flasim për ekonomi moderne nëse kemi procedura administrative të vjetruara. Nuk mund të flasim për shtet konkurrues nëse investitorët përballen me barriera administrative. Nuk mund të flasim për besim tek institucionet nëse qytetarët ndjejnë se sistemi nuk i ndjek nevojat e tyre. Prandaj Qeveria mbetet fuqimisht e përkushtuar ndaj procesit të modernizimit të administratës publike, digjitalizimit të shërbimeve, uljes së procedurave burokratike dhe krijimit të institucioneve që do të jenë më afër qytetarëve se kurrë më parë. Por reformat nuk mund të zbatohen vetëm me ligje të reja dhe strategji të reja. Reformat i bëjnë njerëzit. Ato varen nga çdo nëpunës që do të vendosë të jetë pjesë e ndryshimeve. Ato varen nga çdo udhëheqës që do të zgjedhë që rezultatet të jenë më të rëndësishme se formalitetet. Ato varen nga çdo institucion që do të pranojë kulturën e llogaridhënies, përgjegjësisë dhe profesionalizmit. Unë sinqerisht besoj se shumica dërrmuese e të punësuarve në administratën publike janë njerëz të ndershëm, të përkushtuar dhe punëtorë, të cilët duan të punojnë në mënyrë profesionale dhe duan të jenë pjesë e ndryshimeve pozitive në shtet, shpjegoi Mickoski.

Mickoski deklaroi se nëse duam që Maqedonia të përshpejtojë, duhet të përshpejtojnë edhe institucionet, ashtu siç nëse duam më shumë besim tek shteti, duhet të kemi më shumë besim tek institucionet.

Detyra jonë si Qeveri është të krijojmë një sistem që do t’i njohë, motivojë dhe shpërblejë pikërisht ata njerëz. Një sistem në të cilin dija do të jetë përparësi. Një sistem në të cilin integriteti do të jetë vlerë. Një sistem në të cilin rezultatet do të jenë masë e suksesit. Një sistem në të cilin qytetarët do të jenë kriteri më i rëndësishëm për të përcaktuar nëse jemi të suksesshëm apo jo. Maqedonia sot ndodhet në një periudhë të një cikli të fuqishëm zhvillimor. Po ndërtohen rrugë, po hapen investime të reja, po realizohen projekte kapitale, po krijohen mundësi të reja për rritje ekonomike dhe për një standard më të mirë jetese. Por secili prej atyre proceseve, çdo investim, çdo projekt dhe çdo reformë në fund kalon përmes institucioneve. Prandaj administrata e suksesshme nuk është vetëm çështje administrative. Ajo është çështje zhvillimore. Ajo është çështje ekonomike. Ajo është çështje e besimit ndaj shtetit.
Nëse duam që Maqedonia të përshpejtojë, atëherë edhe institucionet duhet të përshpejtojnë. Nëse duam më shumë investime, duhet të kemi institucione më efikase. Nëse duam më shumë mundësi për të rinjtë, duhet të kemi shërbime publike më të mira. Nëse duam besim më të madh në shtet, duhet të kemi besim më të madh tek institucionet. Prandaj unë besoj se ditët më të mira për administratën publike janë përpara nesh. Besoj se mund të ndërtojmë institucione që do të jenë shembull i profesionalizmit. Besoj se mund të ndërtojmë një administratë që do të jetë krenaria e shtetit. Besoj se mund të krijojmë një sistem në të cilin qytetarët do të ndjejnë se institucionet punojnë për ta dhe për nevojat e tyre. Dhe besoj se së bashku mund ta rikthejmë besimin aty ku i nevojitet më shumë një shoqërie – tek institucionet shtetërore, deklaroi Mickoski