Musliu: Ku shkelë, çka sheh e çfarë prekë Albin Kurti janë projekte gjigande të PDK-së

Deputetja e PDK-së, Ganimete Musliu ka folur rreth deklaratave të partisë në pushtet që nëse vendi shkon në zgjedhje, do të fitojnë më shumë se 51%. Deklarata të tilla sipas saj janë hipokrizi.Musliu në një intervistë për GazetaBlic tha se, edhe nëse PDK-ja qeverisë vendin, dëmet që i ka shkaktuar Qeveria e Albin Kurtit janë vështirë të rregullohen.
“Deklaratat e tilla janë hipokrizi, arrogancë dhe mos respekt për besimin e qytetarëve. Këta le të vazhdojnë kështu sepse neve po na bëjnë nderë me deklarata të tilla nga të cilat nuk frikësohemi”, tha Musliu.“PDK është shembull se di duhet të pranohen rezultatet zgjedhore, prandaj nëse mbahen ne nuk e kemi problem se ku do të jemi. Problemin kryesor e kemi ku është Kosova sot dhe ku do të jetë pas 10 viteve. Fatkeqësisht dëmet që i ka shkaktuar Albin Kurti, ne nuk do të mund t’i sanojmë edhe 10 vitet e ardhshme”, shtoi ajo.
Musliu thotë se, kryeministri Kurti e ka mllefin me PDK-në pasi sipas saj, kudo shkon dhe çkado prekë ai, është projekt i PDK-së.“Nëse këta mendojnë se me propagandë mund të fitojnë 80%, le të vazhdojnë e le t’i fitojnë 100%, por është domosdoshmëri e qytetarëve që vendi të shkojë në zgjedhje. Një kryeministër i cili vendin nuk e sheh të denjë për ta rritur dhe edukuar vajzën e vetë, ai njeri nuk e meriton me qeverisë me popullin e Kosovës. Sa më shpejt që kjo Qeveri shkon në shtëpi aq më shpejt do të largohen dëmet dhe problemet që po shkaktohen”, tha Musliu.
“Mllefin kjo Qeveri e ka me PDK-në dhe e kuptojë shumë mirë, sepse ngado që shkelë Albin Kurti, ngado që sheh syri i tij, Albin Kurti ka për të prekur në projektet gjigande që i ka realizuar PDK-ja”, përfundoi Musliu për GazetaBlic.