Irani dënon me mbi 5 vite burg regjisorin fitues të Palmës së Artë

Regjisori iranian Jafar Panahi, fitues i Palmës së Artë në Festivalin e Filmit në Kanë, është dënuar në mungesë me pesë vite e një muaj burg. Gjykata ka urdhëruar gjithashtu konfiskimin e pasurive të tij dhe i ka ndaluar udhëtimet jashtë vendit dhe përdorimin e rrjeteve sociale për dy vjet.

Lajmin e bëri të ditur avokati i tij, Mostafa Nili, duke shtuar se akuzat konkrete që çuan në vendimin e fundit nuk janë bërë të qarta. Sipas tij, ndaj regjisorit janë ende të hapura tri çështje ligjore.

Panahi ishte kthyer në Iran në mars, pas promovimit jashtë vendit të filmit It Was Just an Accident, që fitoi Palmën e Artë vitin e kaluar. Ai ishte dënuar më herët me një vit burg për akuza që lidhen me propagandë kundër sistemit.

Vendimi ka nxitur shqetësime për lirinë e shprehjes dhe presionin ndaj artistëve në Iran. Avokatë dhe përfaqësues të komunitetit artistik e kanë kritikuar dënimin, duke e cilësuar si pjesë të përpjekjeve për të kufizuar zërat e pavarur.