Sondazhe të reja – VMRO-DPMNE dhe Mickoski vazhdojnë të jenë në epërsi, BDI dhe VLEN afër

Dallimet në përqindjet e mbështetjes mes VMRO-DPMNE-së dhe LSDM-së, si dhe mes liderëve të tyre, Hristijan Mickoski dhe Venko Filipçe, janë të mëdha, tregon anketa e fundit e MKD.mk, e realizuar nga agjencia Market Vision gjatë periudhës 11–27 shtator, me një mostër prej 1.200 të anketuarish.

Në pyetjen: “Për cilën parti politike do të votoni në zgjedhjet e ardhshme?”, 19,3 për qind janë përgjigjur se do të votojnë për VMRO-DPMNE-në, 5,6 për qind për LSDM-në, ndërsa përqindjet e mbështetjes për BDI-në dhe VLEN-in janë të barabarta – nga 4,2%.

41 për qind e të anketuarve kanë deklaruar se nuk do të dalin për të votuar, nuk e dinë nëse do të votojnë apo nuk dëshirojnë t’i përgjigjen kësaj pyetjeje.

Në mesin e të anketuarve që kanë përcaktuar se për cilën parti politike do të votojnë, 4 për qind do të votonin për Levicën, ndërsa 1 për qind për ZNAM-in.

Edhe te liderët politikë, besimi ndaj Hristijan Mickoskit, kryetarit të VMRO-DPMNE-së (20,4%), është dukshëm më i lartë sesa besimi ndaj Venko Filipçes, kryetarit të LSDM-së (3,8%).

Plot 44,1% e të anketuarve nuk kanë besim te asnjë lider i partive politike, ndërsa 12,5% nuk dëshirojnë t’i përgjigjen kësaj pyetjeje.

Besimi ndaj Ali Ahmetit është 3,7%, ndaj Dimitar Apasievit 3,4%, ndërsa ndaj Izet Mexhitit 2,6%. Liderët e partisë së re politike VLEN, Izet Mexhiti, Bilall Kasami dhe Afrim Gashi, kanë mbështetje më të madhe sesa lideri i BDI-së në opozitë.

Edhe anketa e realizuar në qershor tregoi epërsi të theksuar të VMRO-DPMNE-së dhe Mickoskit ndaj LSDM-së në opozitë.

Anketa është realizuar përmes metodës CATI – anketim telefonik, me një mostër prej 1.200 të anketuarish (marzhi i gabimit statistikor: 3%; intervali i besueshmërisë: 95%).

Mostra është përfaqësuese në nivel të Maqedonisë, sipas rajonit, gjinisë, moshës dhe përkatësisë etnike, në përputhje me të dhënat për popullsinë rezidente nga regjistrimi i popullsisë i vitit 2021.