Moldavia në alarm, pesë mjete ajrore shkelin hapësirën e saj

Tre raketa dhe dy dronë hynë në hapësirën ajrore të Moldavisë mëngjesin e 3 tetorit, gjatë sulmeve ruse ndaj Ukrainës.

Ministri moldav i Mbrojtjes, Anatolie Nosatîi, tha se pesë incidentet u regjistruan në territorin e vendit dhe se autoritetet kanë mbledhur prova nga zonat ku ranë mbetjet.

Fragmentet u gjetën në disa zona, përfshirë Căușeni, Hîncești, Anenii Noi dhe Ștefan Vodă. Në zonën e Crocmazit u raportua edhe një zjarr dhe dëme materiale, por nuk pati viktima.

Nosatîi deklaroi se mjetet ajrore dyshohet se ishin ruse dhe se incidentet lidhen me sulmet ndaj Ukrainës. Ai tha se Moldavia po punon për forcimin e mbrojtjes ajrore dhe sigurimin e sistemeve për interceptimin e dronëve dhe raketave.

Presidentja Maia Sandu dënoi shkeljen e hapësirës ajrore dhe paralajmëroi se lufta në Ukrainë po paraqet një rrezik gjithnjë e më të drejtpërdrejtë për Moldavinë.