Turqia arreston 324 persona të dyshuar për lidhje me ISIS-in në një operacion masiv
Autoritetet turke kanë arrestuar 324 persona të dyshuar për lidhje me organizatën terroriste “Shteti Islamik” në një operacion të gjerë të kryer në të gjithë vendin, njoftoi sot Ministria e Punëve të Brendshme e Turqisë.
Në njoftim thuhet se arrestimet u kryen në 47 provinca, ndërsa në mesin e të arrestuarve ka persona të dyshuar për financimin e ISIS-it, si dhe individë që besohet se kanë qenë aktivë në radhët e kësaj organizate më parë.
”Për paqen, unitetin dhe solidaritetin e kombit tonë, ne vazhdojmë operacionet tona pa u lodhur, ditë e natë, 365 ditë të vitit,” thuhet në njoftimin e ministrisë.
Deri më tani nuk janë publikuar detaje mbi shtetësinë e të arrestuarve.
Turqia edhe më parë ka ndërmarrë aksione të ngjashme kundër pjesëtarëve të Shtetit Islamik, i cili ka kryer disa sulme vdekjeprurëse në vend, përfshirë sulmin në klubin e natës “Reina” në Stamboll gjatë natës së Vitit të Ri në vitin 2017, ku u vranë 39 persona.
Në dhjetor të vitit të kaluar, pati një përleshje të armatosur mes anëtarëve të ISIS-it dhe policisë në Turqinë veriperëndimore, ku mbetën të vrarë tre policë dhe gjashtë ekstremistë. Muajin e kaluar, tre sulmues hapën zjarr ndaj policisë para ndërtesës ku ndodhet konsullata e Izraelit në Stamboll, pasuar nga një shkëmbim zjarri ku një nga sulmuesit mbeti i vrarë.
