Mickoski nga Vjena: Përcaktimi i Qeverisë është i qartë, ndërtojmë ekonomi e cila krijon, e jo vetëm që shpenzon
Kryeministri i Maqedonisë së Veriut, Hristijan Mickoski, nga Vjena theksoi se Europa ndodhet në një moment vendimtar ku duhet të zgjedhë mes reagimit ndaj krizave apo udhëheqjes së tyre. Ai vuri në dukje se siguria, energjia dhe ekonomia janë kthyer në çështje jetike, ndërsa vendimet konkrete kanë më shumë peshë se deklaratat.
Mickoski deklaroi se vendi synon ndërtimin e një ekonomie që prodhon dhe krijon vlerë, një shteti që garanton siguri dhe një sistemi ku puna shpërblehet. Sipas tij, investimet janë kyçe për zhvillim, por theksoi se Maqedonia e Veriut nuk kërkon vetëm investitorë të huaj, por partneritete afatgjata të bazuara në besim dhe vizion të përbashkët.
Ai veçoi Austrinë si një partner strategjik, duke kërkuar thellimin e bashkëpunimit në fusha si prodhimi, energjetika, transformimi digjital dhe infrastruktura. Po ashtu, ai e cilësoi tranzicionin energjetik si një mundësi për ndërtimin e një ekonomie më të fortë dhe më të qëndrueshme.
Në fund, Mickoski theksoi se një Europë e fortë nuk mund të ekzistojë pa zhvillim të barabartë të të gjitha vendeve dhe bëri thirrje për më shumë bashkëpunim dhe përgjegjësi të përbashkët, duke përfunduar se Europa duhet të jetë rezultat konkret, jo vetëm një ide.
