Oda e Turizmit kërkon nga Greqia pezullimin e kontrolleve biometrike (EES) për turistët e Maqedonisë gjatë verës

Oda e Turizmit dhe Hotelerisë i ka kërkuar Ministrisë greke të Turizmit që, gjatë sezonit turistik veror, turistët nga vendi ynë të përjashtohen nga kontrollet biometrike për hyrje dhe dalje në BE (EES), me qëllim që të reduktohen turmat në kufij dhe të ulen kostot e agjencive turistike lidhur me vonesat, informon kreu i odës, Arkan Kerim.

​– Sot kemi kontaktuar me ministren greke të Turizmit dhe kemi kërkuar që turistët maqedonas të përjashtohen nga ky sistem në periudhën nga 1 qershori deri më 1 shtator. Shpresojmë që ministrja do ta marrë parasysh kërkesën tonë dhe se këto ditë do të marrim një përgjigje pozitive – thotë Kerim.

​Kjo kërkesë e Odës maqedonase të Turizmit dhe Hotelerisë vjen pas informacionit sipas të cilit qeveria greke vendosi që qytetarët e Britanisë së Madhe të mos i nënshtrohen kontrollit biometrik gjatë hyrjes në vend, ku arsyeja kryesore ishte se 4,89 milionë turistë britanikë e vizituan Greqinë në vitin 2025.

​Punonjësit turistikë nga vendi besojnë se Greqia do ta shfrytëzojë rekomandimin e Komisionit Evropian, i cili thotë se çdo shtet në një moment të caktuar mund ta ndalojë sistemin EES kur kufijtë mbingarkohen dhe sistemi bëhet shumë i ngadaltë.

​– Sistemi po tregon dobësi që në fillim të vendosjes së tij. Autobusët me turistë në pjesën greke të kufirit presin edhe nga 5 orë, gjë që krijon kolona të gjata. Nëse, nga ana tjetër, shfaqen autobusë turistikë dykatësh me 90 pasagjerë para autobusit tuaj, pritja mund të zgjasë edhe më shumë se 5 orë. Kufiri grek është i pajisur me aparaturë të mirë, por gjatë marrjes së shenjave të gishtave, procesi bllokohet te çdo i 10-ti pasagjer dhe pastaj duhet pritur.

Problemin e dinë edhe autoritetet greke, por se çfarë do të ndërmarrin gjatë turmave të mëdha me fillimin e sezonit veror, nuk dihet – thotë Donço Nacev.
​Nacev kujton edhe problemet shtesë të punonjësve turistikë me orarin e punës së shoferëve, udhërrëfyesit turistikë dhe vonesat në destinacionin e dëshiruar, si dhe kostot që kanë agjencitë.

​– Gjatë vikendit të Pashkëve, autobusi ynë u mbajt 5 orë në kufirin grek. Nëse tura është e lidhur me orarin e trageteve për në Korfuz, Zakintos apo ishujt e tjerë, atëherë jemi me vonesë që në fillim, ndërkohë që biletat e tragetit janë të siguruara. Ky është një pjesë e problemit.

Shoferët që kanë pritur 5 orë në kufi dhe janë nisur nga Maqedonia, tashmë e kanë kaluar orarin e lejuar të punës dhe duhet të ndërrohen. Së bashku me kthimin, ata i tejkalojnë orët e punës, por edhe kohën e qëndrimit në zonën Shengen. E gjithë kjo e bën punën problematike.

Sa u përket turistëve, ata duhet të shpenzojnë plus një ose dy ditë për udhëtim para se të fillojnë pushimet – thotë ai.
​Nacev konsideron se përveç odave të turizmit që reagojnë të parat, është e nevojshme që edhe Ministria e Kulturës dhe Turizmit të kërkojë nga Ministria greke e Turizmit që të angazhohet për ndërmarrjen e masave konkrete për të reduktuar pritjet e gjata në kufi, pasi turistët maqedonas në Greqi janë të shumtë dhe të rregullt, dhe punonjësit grekë të turizmit nuk do të dëshironin t’i humbnin ata.

​Përveç punonjësve tanë turistikë, edhe ata serbë shpresojnë se Greqia do t’i lirojë qytetarët e Serbisë nga kontrolli biometrik në kufijtë grekë, nëse jo me vendim të veçantë, të paktën me zbatimin më të shpeshtë të përjashtimit që e jep Komisioni Evropian.

​Sistemi i hyrje-daljes në BE (EES), i cili filloi të zbatohet para dy javësh, shkaktoi turma të mëdha në të gjithë kufijtë e BE-së, veçanërisht në trafikun ajror ku pritet me orë të tëra për të përfunduar formalitetet, ndërsa pasagjerët po humbasin edhe aeroplanët. Për këtë arsye, organizatat e aviacionit kërkuan fleksibilitet më të madh në kufij.