Dy shtete ku mund të ikë Gruevski?!

Ndërsa shumëkush pret rikthimin e Nikola Gruevski në vend, pas zhvillimeve politike në Hungari, ish-kryeministri dhe i arratisuri duket se ka ende kohë të mjaftueshme për të menduar hapat e tij të ardhshëm. Sipas informacioneve të “Fokus”, gjasat që ai të kthehet janë minimale, pasi, qoftë edhe për një periudhë të shkurtër, do të duhej të përballej me burg. Në vend të kësaj, ai ka në dispozicion dy opsione për të vazhduar lirinë e tij: të strehohet në Rusi ose në Turqi, shkruan Fokus.

Një tregues tjetër se Gruevski nuk po nxiton të kthehet është fakti se kompania e tij në Hungari vazhdon të jetë aktive.

Kompania “I.C.I.C. Kft.” u regjistrua nga ai në verën e vitit 2021, më 14 korrik, në fshatin Peçel, rreth 20 kilometra nga Budapest. Selia e saj ndodhet në një shtëpi të braktisur në rrugën “Boçkai” nr. 9, ndërsa Gruevski figuron si pronari i vetëm dhe drejtor ekzekutiv.

Edhe pse kompania operon prej pesë vitesh dhe realizon të ardhura në forinta hungareze, fitimi i tij i përkthyer në euro mbetet relativisht i ulët. Megjithatë, është e rëndësishme që kompania nuk ka raportuar humbje, por ka gjeneruar fitim çdo vit.

Sipas raportit të fundit financiar për vitin 2024, ai ka realizuar fitim prej 4.1 milionë forintash (rreth 10.500 euro), krahasuar me rreth 9.700 euro një vit më parë. Pas shpenzimeve dhe taksave, fitimi neto ishte 6.860 euro, nga të cilat mbi 5.000 euro janë tërhequr si dividend.

Raporti tregon gjithashtu se ai konsiderohet kreditor i besueshëm, pasi në bilanc figuron një borxh prej 2.5 milionë forintash (rreth 6.500 euro).

Fokusi kryesor i kompanisë është konsulenca në biznes, por ajo është e licencuar edhe për aktivitete të ndryshme tregtare, përfshirë tregtinë me shumicë të porcelanit dhe produkteve të pastrimit, ushqimeve, pijeve dhe duhanit, si dhe menaxhim asetesh, marketing dhe marrëdhënie me publikun.

Në përpjekje për zgjerim, Gruevski në vitin 2022 ka shtuar edhe 10 veprimtari të reja, duke përfshirë tregtinë me mobilje, materiale ndërtimi, pajisje sanitare, produkte për shtëpi, bojëra, xhama dhe mbulesa të ndryshme.

Ende nuk ka informacione nëse ai zotëron prona në Budapest, ndërsa adresa e tij e banimit mbetet e panjohur. Gjatë regjistrimit të kompanisë, si adresë personale ai ka deklaruar të dhënat e avokatit të tij në Budapest.