Bozhinovska: Çmimet e karburanteve mbeten të qëndrueshme –  sigurohet zbritje shtesë për naftën

Ministria e Energjisë, Minierave dhe Burimeve Minerale informon opinionin publik se masat e ndërmarra nga Qeveria, në kombinim me hapa konkretë nga operatorët ekonomikë, po japin rezultate – çmimet e karburanteve janë stabilizuar, ndërsa presioni i çmimeve është zbutur ndjeshëm.

Në këtë drejtim, OKTA e vazhdon iniciativën për zbritje të karburanteve edhe pas afatit fillestar të paraparë në fund të marsit, ndërsa masa do të zgjasë deri më 6 prill. Si pjesë e këtij vazhdimi, zbritja për naftën rritet nga 2 në 3 denarë për litër, duke siguruar mbështetje shtesë për konsumatorët dhe duke kontribuar në stabilizimin e tregut.

Ky hap vjen si rezultat i komunikimit dhe koordinimit të vazhdueshëm ndërmjet Ministrisë dhe kompanive, me një qëllim të qartë – një pjesë e lehtësimeve të transferohet drejtpërdrejt te qytetarët dhe ekonomia. Kjo paraqet konfirmim se roli aktiv i shtetit jep rezultate dhe se përmes partneritetit me kompanitë mund të sigurohen përfitime konkrete për qytetarët dhe ekonominë.

Njëkohësisht, rol kyç në stabilizimin e çmimeve ka edhe masa qeveritare për uljen e TVSH-së për karburantet nga 18% në 10%, e cila siguroi ulje direkte të çmimeve prej 6 deri në 7 denarë për litër dhe parandaloi një goditje shtesë çmimesh.

Me këtë ndërhyrje të kombinuar:

·       parandalohet rritja e konsiderueshme e çmimeve të karburanteve

·       sigurohet stabiliteti i tregut

·       mbrohet standardi i jetesës së qytetarëve

·       presioni mbi transportin dhe ekonominë është reduktuar

“Parandaluam një goditje çmimesh, stabilizuam çmimin dhe siguruam ulje konkrete për qytetarët,” theksoi ministrja Sanja Bozhinovska.

Ministria thekson se përgjegjësia në kushte të tilla është e përbashkët dhe se shembulli pozitiv me rritjen e zbritjes për naftën duhet të ndiqet edhe nga pjesëmarrësit e tjerë në treg, me qëllim që përfitimet të reflektohen plotësisht në çmimet me pakicë.

Paralelisht, furnizimi me karburante zhvillohet pa pengesa, rezervat shtetërore janë stabile, ndërsa të gjitha institucionet kompetente janë në koordinim të vazhdueshëm dhe kryejnë kontrolle të shtuara në treg.

Ministria e Energjisë, Minierave dhe Burimeve Minerale mbetet plotësisht e përkushtuar në ndjekjen e gjendjes dhe, nëse është e nevojshme, është e gatshme të reagojë me masa shtesë, me prioritet të vetëm – një treg stabil dhe mbrojtjen e qytetarëve dhe ekonomisë.