Skandal në një bankë në Tetovë, punonjësja i vjedh 39.000 euro të klientit

Sektori për Punë të Brendshme (SPB) Tetovë ka dorëzuar padi penale kundër shtetases B.B.I. (31 vjeç) nga Tetova, për shkak të ekzistimit të dyshimit të bazuar për kryerjen e veprës penale “përvetësim”.

Sipas raportit të policisë, e denoncuara, në cilësinë e punonjëses në një filial banke në Tetovë, më datë 03.11.2025, në ambientet zyrtare të bankës ka pranuar shumën prej 39.000 eurosh nga një 59-vjeçar tetovar. Paratë ishin dorëzuar me qëllim që të depozitoheshin në llogarinë e tij bankare. Megjithatë, në vend që t’i transferonte mjetet brenda afatit prej tre ditësh, ashtu siç i kishte premtuar klientit, ajo i ka përvetësuar ato në mënyrë të paligjshme.

Më datë 18.11.2025, i dëmtuari ka shkuar sërish në bankë dhe pas një takimi me personin e autorizuar të filialit, po atë ditë i është kthyer një pjesë e parave. Sa i përket pjesës tjetër të mbetur, personi i autorizuar e ka udhëzuar atë te një drejtues i një personi juridik, i cili po ashtu i ka kthyer një pjesë të mjeteve. Megjithatë, shuma prej 39.000 eurosh nuk i është rimbursuar plotësisht të dëmtuarit.