Tragjedi në Turqi: Autobusi përmbyset në Antalia, 8 të vdekur dhe 26 të plagosur

Një autobus është përmbysur në provincën turke të Antalias, raportojnë mediat lokale.

Në aksidentin e rëndë që ndodhi mëngjesin e sotëm, kanë humbur jetën tetë persona, ndërsa 26 të tjerë janë plagosur. Autobusi kishte udhëtuar gjatë natës nga qyteti veriperëndimor Tekirdag drejt Antalias.

Pamjet e publikuara në rrjetet sociale tregojnë automjetin e dalë nga rruga, në një dalje të autostradës në veriperëndim të qendrës së Antalias.

Agjencia e lajmeve DHA njoftoi se disa pasagjerë janë hedhur jashtë autobusit gjatë aksidentit. Disa nga të plagosurit ndodhen në gjendje kritike.

Antalia, një destinacion i njohur turistik në Mesdhe, është përfshirë nga reshje të dendura shiu ditët e fundit, duke i bërë rrugët të lagështa dhe me mjegull.

Sipas informacioneve të para, shoferi i autobusit po lëvizte me shpejtësi të madhe. Deri më tani nuk ka prova se autobusi është goditur nga ndonjë automjet tjetër.