Aksidenti tragjik ku humbi jetën 18-vjeçarja në Durrës, gjykata lë në burg 26-vjeçarin

Në Gjykatën e Durrësit është mbajtur të shtunën seanca për masën ndaj shtetasit Arbër Xhaxhaj, i cili u aksidentua pranë mbikalimit të plazhit ku si pasojë mbeti e vdekur 18-vjeçarja Vikena Greku.

Gjykata ka caktuar të vlefshme masën arrest me burg ndaj 26-vjeçarit me akuzën ”Drejtimi i mjetit ne mënyrë të parregullt” dhe “Shkelja e rregullave te qarkullimit rrugor”.

Vikena Greku, 18 vjeçe humbi jetën si pasojë e një aksidenti tragjik mbrëmjen e së enjtes, ku një mjet ‘fluturoi’ nga Ura e Dajlanit dhe përfundoi brenda një biznesi.

Mjeti drejtohej nga 26-vjeçari Arbër Xhaxhaj, i cili dyshohet se kishte konsumuar alkool dhe po udhëtonte me shpejtësi mbi normën e lejuar.