Pas sulmeve ndaj njerëzve, qentë endacakë në Gazi Babë dëmtojnë edhe automjete

Një banore e lagjes Gazi Babë ka reaguar publikisht pasi një qen endacak i ka dëmtuar automjetin, duke shkaktuar dëme të konsiderueshme materiale në pjesën e përparme të veturës.

Në fotografitë e publikuara në rrjetet sociale shihet një pjesë e shkëputur e parakolpit dhe dëmtime rreth rrotës.

Sipas qytetarëve, raste të tilla nuk janë të izoluara dhe ndodhin shpesh kur qentë ndjekin mace ose brejtës që fshihen nën kapakët e makinave. Pronaria pyet publikisht se kush do ta dëmshpërblejë për dëmin e shkaktuar, duke rihapur kështu çështjen e përgjegjësisë së komunave dhe të NP “Lajka”.

Qytetarët shprehin frikë për sigurinë dhe pronën e tyre, ndërsa procedurat për dëmshpërblim mbeten të paqarta dhe të ndërlikuara.