Dimri rikthehet në Zvicër: Bora pritet edhe në fushat e ulëta

Pas disa ditësh të pazakonta e të ngrohta dimri rikthehet këtë javë në Zvicër. Sipas MeteoSwiss, nga mbrëmja e së mërkurës dhe gjatë natës, reshje bore priten të zbresin deri në fushat e ulëta, me shtresa bore deri në 5 centimetra në disa zona të Plateau-s.

Të enjten, në zonën e Liqenit të Gjenevës, kodrat mbi Lozanë dhe Lavaux, reshjet mund të intensifikohen përkohësisht për shkak të fenomenit të njohur si “efekti i liqenit”, ku ajri i ftohtë ndërvepron me ujërat ende të ngrohtë të liqenit.

Temperaturat mbeten të ulëta dhe era e fortë nga veriu do të përforcojë ndjesinë e ftohtit. Vitin e kaluar, reshjet e para të borës ranë më 21 nëntor, duke shkaktuar pengesa në trafikun rrugor dhe hekurudhor./albinfo