Bilall Kasami nëpërmjet Saubermacherit kërcënon bizneset në Tetovë!
Bizneset në Tetovë po përballen me trysni për të nënshkruar kontrata me kompaninë e pastrimit Saubermacher, e cila operon në qytet nëpërmjet një marrëveshjeje publike-private me Komunën e Tetovës shkruan Tetovasot.
Sipas informacioneve të publikuara sot, kryetari i Komunës, Bilall Kasami, përmes përfaqësuesve ligjorë – përfshirë një avokat maqedonas – ka paralajmëruar masa ndëshkuese financiare ndaj bizneseve që refuzojnë të firmosin kontratën. Atyre u është dhënë afat 5-ditor, dhe në rast mosrespektimi, kërcënohen me gjoba që variojnë nga 10 mijë deri në 100 mijë euro.
Dokumentet e shpërndara si “dëshmi” përmbajnë paralajmërime zyrtare të firmosura nga përfaqësues ligjorë, të cilat theksojnë detyrimin për bashkëpunim me kompaninë e kontraktuar.
Kjo situatë ka ngjallur reagime të ashpra nga komuniteti i biznesit, të cilët e shohin këtë veprim si shkelje të lirive ekonomike dhe imponim të një operatori të vetëm në kundërshtim me parimet e konkurrencës së lirë.
Deri tani, Komuna e Tetovës nuk ka dhënë ndonjë deklaratë zyrtare mbi këtë çështje, ndërsa pritet që në ditët në vijim reagimet dhe debatet publike të intensifikohen.
