BDI: Bilall Kasami po përdor ndërmarrjet publike për blerje votash – Prokuroria të veprojë!

Me afrimin e zgjedhjeve lokale që pritet të mbahen në muajin tetor, dega e Bashkimit Demokratik për Integrim (BDI) në Tetovë ka reaguar ashpër ndaj kryetarit aktual të Komunës, Bilall Kasami, duke e akuzuar për keqpërdorim të pushtetit dhe përpjekje për blerje votash përmes kontratave fiktive dhe shpërndarjes së mjeteve financiare në mënyrë të dyshimtë.

Në reagimin e publikuar nga BDI, thuhet se Kasami, bashkë me “klanin e tij dhe drejtorët e ndërmarrjeve komunale”, po premtojnë vende pune dhe kontrata të rreme, duke e rënduar buxhetin komunal dhe duke cenuar interesin publik vetëm për qëllime elektorale.

“U bëjmë thirrje organeve të drejtësisë, në veçanti Prokurorisë, që të ndërhyjë urgjentisht dhe të nisë hetim të thelluar mbi aktivitetet financiare dhe transaksionet e ndërmarrjeve komunale, të cilat po përdoren si instrument për të ndikuar te votuesit,” thuhet në reagimin e BDI-së.

Partia gjithashtu ka bërë një akuzë serioze duke pretenduar se fushata e Kasamit po financohet nga donacione të ardhura nga kompani serbe.

“E pyesim publikisht Bilall Kasamin: për sa e shitët shpirtin dhe kujt i jeni borxhli? Si është e mundur që me paratë e kompanive serbe po tentoni të blini votat e shqiptarëve?” – thuhet në deklaratë.

BDI ka bërë thirrje drejtpërdrejt edhe për qytetarët e Tetovës që të mos bien pre e “mashtrimeve njëmujore”, duke theksuar se “tetovarët nuk janë në shitje”.