U vunë në pranga pas dyshimeve për ndërtimin e një impianti gazi në hapësirë publike, lirohen drejtori dhe inxhinieri i kompanisë

Janë lënë të lirë me vendim të prokurores Esmeralda Basho, drejtori teknik i kompanisë “Delvina Gas”, Luan Metaj, dhe inxhinieri Elton Malkaj, të cilët u arrestuan një ditë më parë nga policia nën akuzën e ndërtimit të një impianti gazi pa leje në pronë publike.

Sipas njoftimit zyrtar që policia e Vlorës bëri dje thuhet se, ‘gjatë kontrollit të ushtruar nga Seksioni për Hetimin e Krimit Ekonomik dhe Financiar, në bashkëpunim me IKMT dhe Inspektoratin e Mjedisit, u konstatua ndërtimi i një impianti gazi në territor publik, pa leje ndërtimi dhe zhvillimi të miratuar nga autoritetet përkatëse.

Në përfundim të kontrolleve, u arrestuan në flagrancë Luan Metaj dhe Elton Malkaj, të dy të dyshuar për veprat penale “Ndërtim i paligjshëm” dhe “Pushtim i tokës”. Ndërkohë, janë shpallur në kërkim pronari i kompanisë, S. M., 56 vjeç, dhe administratori Jugelard Ibrahimi, 36 vjeç, për të njëjtat akuza’.

Nga ana e IKMT-së është bërë bllokimi i punimeve dhe është mbajtur procesverbal për konstatimin e kundërvajtjes.

Megjithatë, kompania “Delvina Gas Company” ka mohuar akuzat. Në një reagim për mediat, avokatët e kompanisë sqarojnë se objekti në fjalë nuk është një impiant prodhimi energjie (TEC), por një impant pastrimi, pjesë integruese e pusit të gazit në vendburimin e Delvinës.

Sipas kompanisë, ky impiant është ndërtuar që prej tre vitesh dhe aktualisht ndodhet në fazë mirëmbajtjeje. Dy teknikët e arrestuar ishin thjesht mirëmbajtës, ndërsa vetë subjekti pretendon se ka ndjekur të gjitha procedurat ligjore në përputhje me kuadrin hidrokarburor në fuqi