‘Krim lufte të ftosh njerëzit e uritur drejt vdekjes’/ 14 viktima të tjerë në një pikë shpërndarjeje ndihmash

Vijon të rritet bilanci i viktimave të vrarë nga forcat izraelite në Rripin e Gazës, pasi përpiqen të sigurojnë ushqime nga ndihmat ndërkombëtare.

Të paktën 14 persona janë qëlluar dhe vrarë nga forcat izraelite pranë një pike shpërndarjeje ndihmash të drejtuar nga Fondacioni Humanitar i Gazës (GHF), raportuan sot burime mjekësore në Rripin e Gazës.

Sipas raporteve palestineze, 37 palestinezë janë vrarë nga veprimet ushtarake izraelite në pjesë të ndryshme të brezit bregdetar që nga fillimi i ditës.

Autoritetet izraelite e kanë mbyllur Rripin e Gazës për gazetarët ndërkombëtarë, përveç vizitave të shkurtra të mbikëqyrura dhe raportet nuk mund të verifikohen në mënyrë të pavarur.

Në përgjigje të një pyetjeje, GHF tha se nuk kishte pasur vdekje ose lëndime pranë pikave të saj të shpërndarjes.

Phillipe Lazarrini, kreu i organizatës së ndihmës së OKB-së për palestinezët, UNRËA, e kritikoi sistemin e shpërndarjes si “të çalë, mesjetar dhe vdekjeprurës” në një postim në X.

“Jetët palestineze janë zhvlerësuar kaq shumë. Tani është rutinë të qëllosh dhe të vrasësh njerëz të dëshpëruar dhe të uritur ndërsa përpiqen të mbledhin pak ushqim nga një kompani e përbërë nga mercenarë”, postoi ai.

“Të ftosh njerëzit e uritur drejt vdekjes është një krim lufte. Ata që janë përgjegjës për këtë sistem duhet të mbahen përgjegjës”, tha Lazzarini.

GHF, e mbështetur nga Izraeli dhe Shtetet e Bashkuara, filloi punën në maj pas një bllokade izraelite që zgjati pothuajse tre muaj, si një alternativë ndaj UNRËA-së dhe organizatave ndërkombëtare të ndihmës.

Izraeli e ka kritikuar UNRËA-në si mbulesë për Hamasin.

Autoriteti izraelit përgjegjës për marrëdhëniet me palestinezët, COGAT, raportoi se të martën 85 kamionë me ndihma kishin hyrë në Rripin e Gazës, ndërsa 380 kamionë të OKB-së ishin gati.

UNRËA ka thënë vazhdimisht se ndihma nuk mund të shpërndahet mjaftueshëm shpejt për shkak të luftimeve dhe mungesës së karburantit.