FFM: Gostivari tradhtoi rëndë publikun e futbollit dhe ndershmërinë në lojë, krimi do të pastrohet plotësisht!

Federata e Futbollit të Maqedonisë (FFM) reagoi me një njoftim pas braktisjes së fushës nga klubi i futbollit Gostivari në ndeshjen kundër Rabotniçkit. Skuadra vendase pësoi gol për 1-2 dhe vendosi të shprehë revoltën ndaj gjykimit duke u tërhequr nga loja.

Gjithashtu, gjyqtarët në raportin e tyre kanë theksuar se kishin marrë kërcënime për një epilog të tillë që në fillim të ndeshjes.

“Në ndeshjen e sotme të Ligës së Parë të Maqedonisë mes KF Gostivarit dhe KF Rabotniçkit ishim dëshmitarë të një akti të turpshëm – braktisjes së qëllimshme dhe të organizuar të fushës nga ekipi i FC Gostivarit. FC Gostivari tradhtoi rëndë publikun sportiv dhe ndershmërinë në garë.

Në vend që të luftonin sportivisht deri në bilbilin e fundit, FC Gostivari vendosi të ikë nga realiteti dhe të hedhë fajin për veprimin e tyre të dëshpëruar mbi gjyqtarët. E vërteta është e dokumentuar: në protokollin zyrtar është shënuar se një përfaqësues i KF Gostivarit kishte njoftuar gjyqtarët që në fillim se ekipi do të tërhiqej nëse rezultati nuk do të ishte në favorin e tyre.

Ky akt është një përpjekje e menduar dhe e qëllimshme nga disa individë që, për arsye përfitimi financiar dhe pritshmërish të parealizuara, zgjedhin ta manipulojnë publikun dhe ta degradojnë skenën e futbollit. Është e qartë se vendimet e fundit të Bordit Drejtues të FFM-së, ku u paralajmërua qartë pastrimi i krimit dhe korrupsionit nga futbolli maqedonas, janë arsyeja e drejtpërdrejtë për këtë veprim të turpshëm.

Ata që për vite ishin mësuar me privilegje, sot, kur sundojnë rregulloret, transparenca dhe ndershmëria, nuk arrijnë të funksionojnë në një sistem të rregullt.

Pavarësisht këtij veprimi të papërgjegjshëm dhe frikacak, sigurojmë publikun se rregullsia e Ligës së Parë të Maqedonisë nuk do të cenohet. Kampionati do të vazhdojë sipas rregullave dhe dispozitave të garës.

Strukturat kriminale dhe papastërtitë në futboll do të pastrohen plotësisht. Federata e Futbollit të Maqedonisë nuk do të lejojë shantazhe dhe presione.

Përkundrazi – FFM do të dalë edhe më e fortë nga këto veprime të koordinuara nëntokësore që po ndodhin intensivisht në ditët e fundit. Voska dhe Gostivari nuk do të jenë ata që do ta njollosin futbollin maqedonas. Ata nuk e kanë krijuar këtë futboll që të kenë të drejtë ta shkatërrojnë. Ata do të përfundojnë aty ku me të vërtetë e meritojnë.

Lufta jonë për një futboll të pastër nuk ka kthim prapa. Shkojmë deri në fund për një futboll maqedonas të rregullt, të ndershëm dhe dinjitoz!”

Ndeshja u ndërpre zyrtarisht në minutën e 85-të, dhe pikët do t’i kalojnë zyrtarisht Rabotniçkit”, njoftoi FFM.