Një anëtar i xhandarmërisë serbe nokautoi një polic me rroba civile, Vuçiç pretendon se fajin e kanë studentët

Presidenti serb Aleksandar Vuçiq shprehu zemërimin e tij në Instagram pasi studentët bllokuan ndërtesën e Radio Televizionit të Serbisë (RTS) në Beograd, duke shkaktuar një përplasje mes policisë dhe studentëve.

Rreth një orë e gjysmë pas incidentit, Vuçiq arriti të fotografohej me një polic, për të cilin pretendon se ishte lënduar nga studentët, dhe e publikoi fotografinë në profilin e tij në Instagram. Personi, për të cilin presidenti serb thotë se është polic dhe ka marrë një “goditje me grusht” nga studentët duke pësuar “lëndime të tmerrshme”, shihet me një mavijosje në sy, ndërsa Vuçiq pozohet në fotografi me një shprehje të zemëruar në fytyrë. Ai i quajti studentët “plenium bolshevikë” dhe paralajmëroi se do të mbajnë përgjegjësi për lëndimin e policit.

“Lazar Baçiç, polic, u sulmua nga anëtarët e Plenumit Bolshevik përpara ndërtesës së RTS-së. Ai ka pësuar lëndime serioze fizike. Frikësuese. E goditën me një boks hekuri. Dhunuesit mendojnë se mund të bëjnë çfarë të duan. Do të mbajnë përgjegjësi për çdo akt dhune që kanë kryer. Kaq për demonstruesit paqësorë. Serbia normale do të fitojë, Serbia demokratike do të fitojë,” shkroi Vuçiq.

Pamjet e publikuara në rrjetet sociale tregojnë se Baçiç u godit nga një pjesëtar i xhandarmërisë serbe.

Sipas videove të shpërndara, shihet qartë se një pjesëtar i forcave speciale policore, i veshur me pajisje të plota, godet një burrë me rroba civile, i cili më pas humb ekuilibrin dhe rrëzohet në tokë. Duke u bazuar në veshjen e personit të goditur, si dhe në pamje dhe fotografi të tjera, mund të konkludohet se bëhet fjalë për policin e lënduar, Lazar Baçiç.