Vazhdojnë negociatat për armëpushimin: Delegacioni i Hamasit në Egjipt së shpejti

Një delegacion i lëvizjes palestineze Hamas do të vizitojë së shpejti Egjiptin për negociata të mëtejshme për një armëpushim me Izraelin, tha grupi militant në një deklaratë sot.

Deklarata shtoi se kreu i Hamasit Ismail Haniyeh konfirmoi “frymën pozitive të grupit në studimin e propozimit të armëpushimit” në një bisedë telefonike me shefin e inteligjencës egjiptiane Abbas Kamel, raportoi Reuters.

Hamasi tha të shtunën se kishte marrë pozicionin e fundit të Izraelit dhe do ta studionte atë përpara se t’i përgjigjej. Al-Qahera News, e cila është e lidhur me shtetin egjiptian, përcolli një deklaratë nga një zyrtar i lartë egjiptian i paidentifikuar, i cili tha se një delegacion i Hamasit do të mbërrinte në Kajro në dy ditët e ardhshme.

Marrëveshja kërkon që 500 kamionë, përfshirë 50 kamionë me karburant, të hyjnë në Rripin e Gazës çdo ditë me furnizime për të sjellë rindërtimin e enklavës. Izraeli do të pezullojë mbikëqyrjen ajrore të Rripit të Gazës për tetë orë çdo ditë dhe për 10 orë në ditët kur pengjet lirohen.

Në fazën e parë, Hamasi do të lirojë të paktën 33 të burgosur – civilë dhe ushtarë, fëmijë deri në 19 vjeç, të moshuar, të sëmurë dhe të plagosur. Për çdo grua dhe fëmijë të liruar, Izraeli do të lironte 20 të mitur dhe të burgosur palestinezë.

Për çdo peng të liruar të moshuar, të sëmurë dhe të plagosur, Izraeli do të lironte 20 të burgosur mbi moshën 50 vjeç, të cilët janë gjithashtu të sëmurë dhe të plagosur dhe që nuk janë duke vuajtur një dënim më të gjatë se 10 vjet.

Për çdo ushtare femër të liruar, Izraeli do të lironte 20 të burgosura që vuanin dënimin e përjetshëm dhe 20 të tjerë që vuajnë deri në 10 vjet burg, të cilat mund të lirohen në Gaza ose jashtë saj. Hamasi do të paraqesë një listë të të burgosurve që dëshiron të lirohet, me deri në 20 emra, ndërsa Izraeli do të ruajë të drejtën e vetos për emrat e dhënë nga Hamasi.

Nga dita e 16-të e armëpushimit, palët do të fillojnë negociatat indirekte për një marrëveshje për të rivendosur paqen e qëndrueshme në Gaza, thuhet në raport.

Faza e dytë e marrëveshjes, e cila do të zgjaste 42 ditë, do të përfshinte përfundimin e marrëveshjeve për një paqe të qëndrueshme. Në atë fazë, civilët dhe ushtarët e mbetur meshkuj izraelitë do të lirohen, në këmbim të një numri të caktuar të burgosurish palestinezë dhe tërheqjes së plotë të IDF nga Gaza, raporton gazeta.

Faza e tretë, e cila do të zgjasë 42 ditë, do të përfshijë shkëmbimin e trupave nga të dyja palët dhe zbatimin e një plani pesëvjeçar për rehabilitimin e Gazës, duke përfshirë një dispozitë që Hamasi nuk duhet të rindërtojë infrastrukturën e tij ushtarake.